ఇస్లామాబాద్: పాకిస్తాన్ మాజీ ప్రధాని ఇమ్రాన్ ఖాన్ను జైలు నుంచి విడుదల చేయాలని డిమాండ్ చేస్తూ ఆయన సపోర్టర్లు చేపట్టిన నిరసన హింసాత్మకం అయింది. ప్రభుత్వ హెచ్చరికలను బేఖాతరు చేస్తూ వారు మంగళవారం దేశ రాజధానికి చేరుకున్నారు. వారు ఇస్లామాబాద్లోకి ప్రవేశించకుండా పోలీసులు ఎన్ని ప్రయత్నాలు చేసినా లాభం లేకుండా పోయింది.
మద్దతుదారులను బలగాలు, పోలీసులు అడ్డుకునే ప్రయత్నం చేయగా పరిస్థితి ఆందోళనకరంగా మారి హింసకు దారితీసింది. ఈ గొడవలో ఆరుగురు భద్రతా సిబ్బంది చనిపోయారు. పదుల సంఖ్యలో సిబ్బంది గాయపడ్డారు. మృతుల్లో నలుగురు పారామిలిటరీ రేంజర్లు, ఇద్దరు పోలీసులు ఉన్నారు. దీంతో ప్రభుత్వం ఇస్లామాబాద్లో భారీ ఎత్తున బలగాలను మోహరించింది. ‘కనిపిస్తే కాల్చివేత’ ఆదేశాలు జారీచేసింది.
