ఐపీఎల్లో చావో రేవో తేల్చుకోవాల్సిన మ్యాచ్ లో అద్భుతమైన సెంచరీతో ఆర్సీబీకి విజయాన్ని అందించిన విరాట్ కోహ్లీ రికార్డులను తిరగరాశాడు. ఐపీఎల్లో అత్యధిక సెంచరీలు చేసిన ఆటగాళ్ల జాబితాలో క్రిస్ గేల్ రికార్డును సమం చేశాడు. ఐపీఎల్ లో గేల్ 6 సెంచరీలు సాధించగా... విరాట్ కోహ్లీ తాజా సెంచరీతో గేల్ తో కలిసి అగ్రస్థానంలో నిలిచాడు.
ఐపీఎల్ లో కోహ్లీ 2019లో సెంచరీ సాధించాడు. కోల్ కతా నైట్ రైడర్స్ పై శతకం బాదాడు. ఆ తర్వాత కోహ్లీ ఇప్పటి వరకు సెంచరీ కొట్టలేదు. మొత్తానికి నాలుగేళ్ల తర్వాత కీలకమైన మ్యాచులో సెంచరీ సాధించి జట్టుకు మరుపురాని విజయాన్ని అందించాడు. ఐపీఎల్ లో ఒకే ఫ్రాంచైజీ తరపున అత్యధిక సెంచరీలు(6) చేసిన ఆటగాడిగా కోహ్లీ రికార్డులకెక్కాడు. కోహ్లీ చేసిన 6 సెంచరీలు రాయల్ ఛాలెంజర్స్ బెంగళూరు తరఫునే చేయడం విశేషం.
మరోవైపు ఐపీఎల్ లో 6 సీజన్లలో 500 కంటే ఎక్కువ పరుగులు చేసిన ఆటగాడిగా కోహ్లీ నిలిచాడు. తొలిసారిగా 2011 ఐపీఎల్ లో 557 పరుగులు చేసిన కోహ్లీ... ఆ తర్వాత 2013లో 634 పరుగులు, 2015లో 505 పరుగులు, 2016లో 973 పరుగులు, 2018లో 530 పరుగులు కొట్ాటడు. ఐపీఎల్-16లో ఇప్పటివరకు 13 మ్యాచులాడిన కోహ్లీ 538 పరుగులతో కొనసాగుతున్నాడు. ఇందులో 6 అర్థసెంచరీలు, ఒక సెంచరీ ఉన్నాయి. అయితే కోహ్లీ 2022 సీజన్ లో అత్యంత చెత్త ప్రదర్శన చేశాడు. ఆ సీజన్ లో 16 మ్యాచుల్లో కేవలం 341 పరుగులు చేశాడు.
ఐపీఎల్ రెండో ఇన్నింగ్స్‌లో అత్యధిక సెంచరీలు చేసిన బ్యాట్స్‌మెన్‌గానూ కోహ్లీ రికార్డు సృష్టించాడు. ఇక ఉప్పల్ లో బెంగుళూరు రెండు సార్లు మాత్రమే గెలిచింది. ఈ రెండిటిలోనూ మ్యాన్ ఆఫ్ ది మ్యాచ్ గా కోహ్లీనే నిలిచాడు. హైదరాబాద్ ఉప్పల్ స్టేడియంలో కోహ్లీకి మెరుగైన రికార్డు ఉంది. ఈ స్టేడియంలో కోహ్లీ 12 టీ-20లు ఆడాడు. ఏకంగా 59.2 సగటుతో 592 పరుగులు చేశాడు. అందులో ఒక సెంచరీ, 4 హాఫ్ సెంచరీలు ఉన్నాయి. అత్యధిక స్కోరు 100.
