గల్ఫ్దేశాలకు పంపేందుకు ఎక్కువ మొత్తంలో డబ్బులు తీసుకుని జగిత్యాలలో ఫేక్ వీసాలు సృష్టిస్తున్న ఓ ఏజెంట్ గుట్టు రట్టైంది. తాము మోసపోయామని గుర్తించిన బాధితులు ఆగస్టు10న మీడియాతో తమ గోడు వెల్లడించారు.
వారు తెలిపిన వివరాల ప్రకారం.. జిల్లా కేంద్రానికి చెందిన రాచకొండ మహేష్ ధర్మపురి రోడ్లోని విగ్నేశ్వర కమ్యూనికేషన్ ఇంటర్నేషనల్ మ్యాన్ పవర్ కన్సల్టెన్సీ నిర్వహిస్తున్నాడు. ఇందుకోసం ఓ షాప్ ని అద్దెకు తీసుకున్నాడు.
ఉపాధి నిమిత్తం గల్ఫ్ దేశాలకు వెళ్లే జిల్లా వాసులకు ఫేక్ వీసాలు చేసి ఇస్తానని చెప్పి వారి నుంచి పెద్ద మొత్తంలో నగదు తీసుకున్నాడు. ఏళ్లుగా ఈ దందా నడుపిస్తూ.. ఇప్పటివరకు రూ.5 కోట్ల వరకు సంపాదించాడు.
ఇటీవల అకస్మాత్తుగా బోర్డు తిప్పేశాడు. దీంతో బాధితులు అతడు ఎక్కడున్నాడో తెలుసుకోవాలని ప్రయత్నించినా లాభం లేకుండా పోయింది. చివరకు రెండ్రోజుల క్రితం వారు పోలీస్స్టేషన్లో ఫిర్యాదు చేశారు.
పోలీసులు సైతం తమ గోడును పట్టించుకోవట్లేదని.. యూరప్, దుబాయ్, కువైట్, థాయిలాండ్ దేశాలకు పంపిస్తామని చెప్పి నకిలీ వీసాలు ఇచ్చి తమను మోసం చేశాడని.. దీంతో రూ.వేలల్లో నష్టపోయినట్లు చెప్పారు. మహేష్ని పట్టుకుని తమకు న్యాయం చేయాల్సిందిగా డిమాండ్ చేశారు.
