హైదరాబాద్, వెలుగు: మహిళల మనోభావాలు, వారి హావభావాలు, చిన్నప్పటి నుంచి పెరిగి పెద్దయి బాధ్యతలను భుజాలకెత్తుకునేదాకా వారి జీవన విధానం, వాళ్లు ఎదుర్కొనే సవాళ్లు, బంధాలను కుంచెతో చాలా అందంగా పలికించారు మాజీ ఎంపీ, బీజేపీ కోర్ కమిటీ సభ్యుడు వివేక్ వెంకట స్వామి కుమారుడు వెంకట్ గడ్డం. ఆయన తన తొలి సోలో ఆర్ట్ ఎగ్జిబిషన్ను శనివారం ఏర్పాటు చేశారు. హైదరాబాద్ బంజారాహిల్స్లోని సప్తపర్ణిలో నిర్వహించిన ఎగ్జిబిషన్లో 44 పెయింటింగ్స్ను ప్రదర్శనకు ఉంచారు. ప్రతి పెయింటింగ్కు దాని వెనుక ఉన్న అర్థాన్ని, భావాన్ని ఆయన రాసి పెట్టారు. ఆయన వేసిన పెయింటింగ్స్ సందర్శకులను ఆకట్టుకున్నాయి. ఈ కార్యక్రమానికి వివేక్ వెంకటస్వామి, ఆయన భార్య, విశాక ఇండస్ట్రీస్ ఎండీ సరోజా వివేక్లు ముఖ్య అతిథులుగా హాజరయ్యారు. వెంకట్ గడ్డం ఆర్ట్స్ లోగోను వివేక్ ఆవిష్కరించారు. చిన్న నాటి నుంచి వెంకట్కు ఆర్ట్స్ అంటే ఆసక్తి అని వివేక్ చెప్పారు. 11 ఏళ్ల వయసులోనే మొదటి ఆర్ట్ ఎగ్జిబిషన్ను కళాభవన్లో ఏర్పాటు చేశామని ఆయన గుర్తు చేశారు. తనలాగే తన కుమారుడు కూడా బిజినెస్మ్యాస్ కావాలనుకున్నానని, కానీ, తన పెయింటింగ్ ట్యాలెంట్ను చూశాక అది తప్పని అర్థమైందని చెప్పారు. మూడేళ్ల వయసు నుంచే పెన్, పెన్సిల్తో వెంకట్ పెయింటింగ్స్ వేసేవారని సరోజ గుర్తు చేశారు. చిన్నప్పుడు దేవతల కథలను బాగా చెప్పానని, టెంపుల్స్కు తీసుకెళ్లానని, ఇప్పుడు పెయింటింగ్స్లో వాటిని చూస్తున్నానని ఆమె చెప్పారు. ఆక్రలిక్ ఆన్ కాన్వాస్ థీమ్తో పెయింటింగ్స్ వేశానని వెంకట్ తెలిపారు. 2018 నుంచి ఇప్పటిదాకా వేసిన పెయింటింగ్స్ను ఎగ్జిబిషన్లో పెట్టామన్నారు. ఈ కార్యక్రమంలో మాజీ ఎ మ్మెల్యే ఏనుగు రవీందర్, విల్ మీడియా డైరెక్టర్ వైష్ణవి, వీ6, వెలుగు సీఈవో అంకం రవి తదితరులు పాల్గొన్నారు. ప్రదర్శన ఆదివారంతో ముగియనుంది.
