- మంచిర్యాలలో ఓటేసిన చెన్నూరు ఎమ్మెల్యే వివేక్ దంపతులు, పెద్దపల్లి ఎంపీ అభ్యర్థి గడ్డం వంశీకృష్ణ
కోల్బెల్ట్, వెలుగు: అసెంబ్లీ ఎన్నికల మాదిరిగానే పార్లమెంట్ ఎన్నికల్లో కూడా తెలంగాణ ప్రజలు మరోసారి కాంగ్రెస్‌‌ను గెలిపించబోతున్నారని చెన్నూరు ఎమ్మెల్యే వివేక్ వెంకటస్వామి అన్నారు. పెద్దపల్లి ఎంపీగా వంశీకృష్ణ విజయం ఖాయం అయిందన్నారు. సోమవారం ఉదయం ఓటు వేసేందుకు వెళ్లే ముందు వివేక్ వెంకటస్వామి-, ఆయన సతీమణి సరోజ, వారి కుమారుడు, పెద్దపల్లి కాంగ్రెస్ ఎంపీ అభ్యర్థి గడ్డం వంశీకృష్ణ మంచిర్యాల జిల్లా కేంద్రంలోని తన నివాసంలో కాకా వెంకటస్వామి ఫొటోకు పూలమాల వేశారు.
అనంతరం వంశీకృష్ణ తన తల్లిదండ్రుల ఆశీస్సులు తీసుకున్నారు. జిల్లా కేంద్రంలోని కార్మెల్ హైస్కూల్‌‌లో వివేక్ వెంకటస్వామి, జడ్పీ గర్ల్స్ హైస్కూల్‌‌లో వంశీకృష్ణ, తల్లి సరోజ ఓటు వేశారు. అనంతరం వివేక్ మాట్లాడుతూ.. ప్రజాస్వామ్యాన్ని కాపాడుకోవడానికే ఈ ఎన్నికలు అని అన్నారు. పెద్దపల్లిలో వంశీకృష్ణకు భారీ మెజారిటీ ఖాయం అయిందని తెలిపారు. రాష్ట్రంలో 12 నుంచి 14 సీట్లలో కాంగ్రెస్ అభ్యర్థులు గెలవబోతున్నారని చెప్పారు. రాష్ట్రంలో బీజేపీ, బీఆర్ఎస్ రెండో స్థానం కోసం కొట్లాడుతున్నాయని అన్నారు. కాగా, మంచిర్యాల, బెల్లంపల్లి ,చెన్నూరు నియోజకవర్గాల్లోని కాంగ్రెస్ పార్టీ లీడర్లతో కలిసి ఓటింగ్ సరళిని వివేక్ వెంకటస్వామి పరిశీలించారు. అలాగే, మంచిర్యాల జడ్పీ చైర్‌‌‌‌పర్సన్ నల్లాల భాగ్యలక్ష్మి, మాజీ ఎమ్మెల్యే నల్లాల ఓదెలు మందమర్రిలో ఓటు హక్కును వినియోగించుకున్నారు.
