కోల్బెల్ట్, వెలుగు : సింగరేణి కార్మికులకు 11 వేజ్ బోర్డు ఒప్పంద బకాయిలు రూ.1,726 కోట్లను నెలలోగా చెల్లించేందుకు ఏర్పాట్లు చేస్తున్నామని సింగరేణి డైరెక్టర్(ఫైనాన్స్, పర్సనల్) ఎన్.బలరాంనాయక్ తెలిపారు. 23 నెలలకు సంబంధించిన వేజ్ బోర్డు బకాయిలను కార్మికులకు చెల్లించాల్సి ఉందని, ఇందు కోసం అన్ని విభాగాలను సన్నద్ధం చేస్తున్నామని శుక్రవారం ఓ ప్రకటనలో ఆయన పేర్కొన్నారు. రూ.1,726 కోట్లను బకాయిలుగా చెల్లించనున్నామని, యావరేజ్గా ఒక్కో కార్మికుడికి రూ.4 లక్షల వరకు అందుతాయని వెల్లడించారు.
సింగరేణి చరిత్రలో ఇంతపెద్ద మొత్తంలో బకాయిలు చెల్లించడం ఇదే మొదటిసారి అని, నెల రోజుల వ్యవధిలో రెండు విడతలుగా కార్మికుల ఖాతాల్లో వాటిని జమచేస్తామన్నారు. 11వ వేజ్బోర్డు వేతనాలను అందరికన్నా ముందు సింగరేణిలో అమలు చేస్తామన్నారు. దీంతో కంపెనీపై ఏడాదికి సుమారు రూ.1200 కోట్ల అదనపు భారం పడుతుందని తెలిపారు. ప్రస్తుతం కొనసాగుతున్న ఉద్యోగులకు మొదట ఎరియర్స్ చెల్లించిన తర్వాత పదవీ విరమణ పొందిన కార్మికులకు చెల్లిస్తామని చెప్పారు.
