ఢిల్లీ: వక్ఫ్ సవరణ బిల్లు పరిశీలన కోసం ఏర్పాటు చేసిన పార్లమెంటరీ సంయుక్త కమిటీ(JPC)ఎన్డీయే సభ్యులు సూచించిన అన్ని సవరణలకు గ్రీన్ సిగ్నల్ ఇస్తూ బిల్లుకు ఆమోదం తెలిపింది. విపక్ష సభ్యుల సూచనలను తిరస్కరించింది. కమిటీ పలు కీలక ప్రతిపాదనలను పరిగణనలోకి తీసుకుని ఈ చట్టాన్ని మరింత ప్రభావవంతంగా రూపొందించే దిశగా ముందుకెళ్లబోతోందని సమావేశం అనంతరం జేపీసీ చైర్మన్ జగదాంబికా పాల్ చెప్పారు. 14 సవరణలకు కమిటీ ఆమోదం తెలిపినట్లు ఆయన తెలిపారు. ఈ సవరణ బిల్లులో విపక్ష సభ్యులతో సహా ఇతర సభ్యులు మొత్తం 44 నిబంధనల్లో మార్పులుచేర్పులు సూచించారు.
ALSO READ | కుంభమేళా 2025: మౌని అమావాస్య ( జనవరి 29) న పుణ్య స్నానం ఎందుకు చేయాలి.. పురాణాల్లో ఏముంది..
విపక్షాల సూచనలను పరిగణనలోకి తీసుకోకపోవడంపై విపక్ష సభ్యులు మండిపడ్డారు. కమిటీ చైర్మన్ ఈ ప్రక్రియను ప్రజాస్వామ్యబద్ధంగా చేయలేదని, ఒక నియంత తరహాలో కమిటీ చైర్మన్ జగదాంబిక పాల్ వ్యవహరించారని టీఎంసీ ఎంపీ కల్యాణ్ బెనర్జీ విమర్శించారు. అయితే.. ఈ విమర్శలపై కమిటీ చైర్మన్ వివరణ ఇచ్చారు. ఈ పరిశీలన ప్రక్రియ అంతా రాజ్యాంగబద్ధంగా, ప్రజాస్వామ్యయుతంగానే జరిగిందని.. మెజారిటీని పరిగణనలోకి తీసుకుని మాత్రమే ముందుకెళ్లినట్లు చెప్పారు.
వక్ఫ్ బిల్లు, 2024లో సవరణలు ఏమిటి?
* 1995 నాటి వక్ఫ్ చట్టంలో సెక్షన్ 40ని తొలగించాలని బిల్లులో కేంద్రం స్పష్టం చేసింది. ఏదైనా ఒక ఆస్తి వక్ఫ్ బోర్డుదా..? కాదా? అని ఈ సెక్షన్ 40 నిర్ణయిస్తుంది. బోర్డుకు విస్తృత అధికారాన్ని ఈ సెక్షన్ కట్టబెట్టింది.
* సింపుల్గా చెప్పాలంటే వక్ఫ్ బోర్డులు తమ ఆస్తులను నిర్వహించే అధికారాన్ని పరిమితం చేయడం, మరింత ప్రభుత్వ నియంత్రణకు వీలు కల్పించడం ఈ బిల్లు లక్ష్యం.
* ఏదైనా వక్ఫ్ ఆస్తికి జిల్లా కలెక్టర్ కార్యాలయంలో రిజిస్ట్రేషన్ తప్పనిసరి చేయాలని ఈ బిల్లు సూచిస్తున్నది. దీంతో ఆస్తిని అసెస్మెంట్ చేయవచ్చని బిల్లులో కేంద్రం ప్రతిపాదించింది.
* ఈ చట్టం అమల్లోకి రాకముందు లేదా తర్వాత వక్ఫ్ ఆస్తిగా గుర్తించిన లేదా ప్రకటించిన ప్రభుత్వ ఆస్తులను వక్ఫ్ ఆస్తిగా పరిగణించరాదని పేర్కొంది.
* ఒక ప్రాపర్టీ వక్ఫ్ ఆస్తినా? లేక ప్రభుత్వ భూమినా? అనేది జిల్లా కలెక్టర్ నిర్ణయిస్తారని, ఆయన నిర్ణయమే అంతిమమని బిల్లులో ప్రతిపాదించారు.
* కలెక్టర్ నిర్ణయం తీసుకున్న తర్వాత రెవెన్యూ రికార్డుల్లో అవసరమైన మార్పులు చేసి రాష్ట్ర ప్రభుత్వానికి నివేదిక సమర్పించవచ్చు.
* కలెక్టర్ తన నివేదికను రాష్ట్ర ప్రభుత్వానికి సమర్పించే దాకా ఆ ఆస్తిని వక్ఫ్ ఆస్తిగా పరిగణించరాదని బిల్లులో పేర్కొన్నారు.
* వక్ఫ్ పాలకవర్గాల్లో మరింత పారదర్శకత, జవాబుదారీతనం రానున్నది.
* ఇందులో మహిళల భాగస్వామ్యం తప్పనిసరి చేసేందుకు కేంద్రం ప్రతిపాదించింది.
* వక్ఫ్ బోర్డులో మహిళలు, ఓబీసీ ముస్లింలు, షియా, బోహ్ర తదితర ముస్లింలకు చోటు కల్పించాలనేది ఈ బిల్లు లక్ష్యం.
* సెంట్రల్ వక్ఫ్ కౌన్సిల్, స్టేట్ వక్ఫ్ బోర్డుల్లో ఇద్దరు మహిళలు తప్పనిసరిగా ఉండాలని బిల్లులో కేంద్రం ప్రతిపాదించింది.
* వక్ఫ్ బోర్డు ద్వారా వచ్చే డబ్బును ప్రభుత్వం సూచించిన పద్ధతిలో వితంతువులు, విడాకులు తీసుకున్నవారు, అనాథల సంక్షేమానికి ఉపయోగించాలని బిల్లు సూచిస్తుంది.
NDA allies have submitted proposed amendments to the Waqf Amendment Bill in the Joint Parliamentary Committee (JPC) pic.twitter.com/ocblOC7UOp
— IANS (@ians_india) January 27, 2025
