- బీఆర్ఎస్లో ఉంటానంటూనే బీజేపీ వైపు అడుగులు
- కిషన్‍రెడ్డి, మంద కృష్ణ మాదిగతో టచ్లోకి.. బీఆర్ఎస్ పెద్దల ఫోన్లు ఎత్తని రమేశ్
- ఏ క్షణమైనా బీజేపీలో చేరే చాన్స్
వరంగల్, వెలుగు: కేసీఆర్ బుజ్జగించడంతో బీఆర్ఎస్లోనే కొనసాగుతానని చెప్పిన ఆ పార్టీ వరంగల్ జిల్లా అధ్యక్షుడు, వర్ధన్నపేట మాజీ ఎమ్మెల్యే ఆరూరి రమేశ్... 24 గంటల్లోనే రూట్మార్చారు. గురువారం బీఆర్ఎస్పెద్దల ఫోన్లు ఎత్తని ఆరూరి.. ఎమ్మార్పీఎస్‍ నేత మంద కృష్ణ మాదిగతో పాటు బీజేపీ స్టేట్‍ చీఫ్‍ కిషన్‍రెడ్డితో టచ్లోకి వెళ్లడంతో బీజేపీలో ఆయన చేరిక లాంఛనమేనని తెలుస్తోంది.
రెండోరోజూ హైడ్రామా..
మాజీ ఎమ్మెల్యే ఆరూరి రమేశ్ హైడ్రామా రెండోరోజు గురువారమూ కొనసాగింది. బుధవారం వరంగల్లో వందలాది మీడియా ప్రతినిధుల సమక్షంలో బీఆర్ఎస్ నేతలు రమేశ్‍ను బలవంతంగా హైదరాబాద్ తరలించడం, మధ్యలో బీజేపీ నేతలు అడ్డుకోవడం, ఈ క్రమంలో ఆయన అంగీ చినిగిపోవడం మొదలు సాయంత్రం బీఆర్ఎస్ అధినేత కేసీఆర్, హరీశ్రావు సమక్షంలో బుజ్జగింపుల వరకు అంతా సినీ ఫక్కీలో సాగింది.
బుధవారం రాత్రే బీఆర్ఎస్ నేతల నుంచి బయటపడ్డ ఆరూరి గురువారం ఉదయం నుంచే బీజేపీ నేతలతో టచ్లోకి వెళ్లారు. ఏక్షణమైనా బీజేపీలో చేరుతారనే ప్రచారం రోజంతా సాగింది. ఆయన ఇప్పటికే ఢిల్లీకి వెళ్లారని కొందరు.. కాదు కాదు హైదరాబాద్లోనే మోదీ సమక్షంలో పార్టీలో చేరుతారని ఇంకొందరు మీడియాకు లీకులిచ్చారు. కానీ ఆరూరి ఎక్కడ ఉన్నారనే దానిపై ఇంకా స్పష్టత రాలేదు.
అసెంబ్లీ ఎన్నికల్లో వర్ధన్నపేట నుంచి పోటీ చేసి ఓడిపోయిన రమేశ్కు వరంగల్ఎంపీ టికెట్ఇచ్చేందుకు కేసీఆర్ సిద్ధమయ్యారు. కానీ బీఆర్ఎస్లో భవిష్యత్ లేదని భావించిన ఆయన.. బీజేపీ నుంచి టికెట్ఆఫర్‍ రావడంతో గులాబీ పార్టీని వీడాలని డిసైడ్‍ అయ్యారు. మంగళవారం బీజేపీ లీడర్లను కలిసి బుధవారం బీఆర్ఎస్కు రాజీనామా చేసేందుకు సిద్ధమైన టైమ్లోనే హైడ్రామా జరిగింది.
బుధవారం ఎప్పట్లాగే వరంగల్ టికెట్ను తిరస్కరించిన రమేశ్.. బీఆర్ఎస్ పార్టీలో మాత్రం కొనసాగుతానని కేసీఆర్కు మాటిచ్చారు. తీరా తెల్లారాక ఒట్టును కాస్తా గట్టున పెట్టి బీజేపీలోకి వెళ్లేందుకు రెడీ అయ్యారు. ఎమ్మార్పీఎస్‍ నేత మంద కృష్ణ మాదిగతో పాటు బీజేపీ స్టేట్‍ చీఫ్‍ కిషన్ రెడ్డితో టచ్లోకి వెళ్లారు. ఈ క్రమంలో గురువారమే బీజేపీలో ఆరూరి చేరిక ఉంటుందని భావించినా చేరలేదు. శుక్రవారం వీలైతే కిషన్ రెడ్డి సమక్షంలో లేదంటే ప్రధాని మోదీ రాష్ట్ర పర్యటనలో చేరిక ఖాయమని ఆరూరి అనుచరుల ద్వారా తెలిసింది.
