- వరదలోనే వరంగల్.. నీట మునిగిన 150 కాలనీలు
- మూడేళ్ల కిందటి కంటే ఈసారి ఎఫెక్ట్ ఎక్కువ
- సాయం కోసం జనం ఎదురుచూపులు
- 24 గంటలుగా కరెంట్ లేక అవస్థలు
వరంగల్/హనుమకొండ, వెలుగు: రికార్డు స్థాయి వర్షాలు కురవడంతో గ్రేటర్ వరంగల్ను వరద చుట్టుముట్టింది. హనుమకొండ పూర్తిగా జలదిగ్బంధమైంది. సోమవారం నుంచి కురుస్తున్న వానలతో వరంగల్ తూర్పు నియోజకవర్గ పరిధిలోని కాలనీలు నీటమునిగాయి. బుధవారం అర్ధరాత్రి నుంచి గురువారం తెల్లవారుజాము వరకు నాలుగు గంటలపాటు దంచికొట్టిన వర్షానికి హనుమకొండలోని కాలనీలు అతలకుతలమయ్యాయి. గ్రేటర్ కార్పొరేషన్పరిధిలో 183 లోతట్టు కాలనీలు ఉండగా.. 150 నుంచి 160 కాలనీల్లోని ఇండ్లలోకి మోకాలు లోతున వరద చేరింది. బుధవారం సాయంత్రం వరకు వరంగల్లో 80 శాతం, హనుమకొండలో 20 శాతం వరద ఎఫెక్ట్ఉండగా, గురువారం ఉదయానికి హనుమకొండ పూర్తిగా నీటమునిగింది. ఇండ్లలోకి నీరు చేరడంతో జనం అల్లాడుతున్నారు. బుధవారం సాయంత్రం కరెంట్సప్లైను బంద్చేసిన అధికారులు గురువారం రాత్రికి కూడా అందించలేకపోయారు.
గంట గంటకూ పెరిగిన ప్రవాహం..
ALSO READ :మోరంచపల్లిలో విధ్వంసాన్ని మిగిల్చిన వరదలు
2016, 2020లో వరదల టైంలో ముంపు ప్రభావం లేని కాలనీలు కూడా ఈసారి నీటమునిగాయి. అసంపూర్తి పనులే ఇందుకు కారణం. హనుమకొండలోని నయీం నగర్ నాలా మరోసారి తన ప్రతాపాన్ని చూపించింది. వడ్డేపల్లి, గోపాల్‍పూర్చెరువుల్లోని వరద పోటెత్తడంతో 40 నుంచి 50 కాలనీలు ఆగమయ్యాయి. గురువారం గంటగంటకు ప్రవాహం పెరగడంతో జనం కేయూసీ రోడ్డులోని పెగడపల్లి డబ్బాల వద్ద మెయిన్‍రోడ్దాటలేకపోయారు. గోపాల్పూర్, అమరావతి నగర్, టీవీ టవర్‍కాలనీ, సరస్వతి నగర్, శ్రీనివాసనగర్‍, ఇంజినీర్స్కాలనీ, సమ్మయ్య నగర్, విద్యా నగర్, అంబేద్కర్భవన్‍, రాజాజీనగర్‍, రంగుబార్లేన్‍, నందితారే నగర్, రాంనగర్‍, వాగ్దేవి కాలేజీ, నయీంనగర్‍, కిషన్‍పుర, ఈద్గా, పోచమ్మకుంట శ్మశానవాటిక రోడ్‍, హనుమాన్‍నగర్‍లోని నాలుగు కాలనీలు, పెగడపల్లి డబ్బాలు ప్రాంతాన్ని వరద చుట్టుముట్టింది. జనాలు ప్రాణాలు అరచేతిలో పెట్టుకుని ఉంటున్నారు. వరంగల్ తూర్పు పరిధిలోని ప్రధాన రోడ్లన్నీ చెరువులను తలపించాయి. ప్రయాణికులను సిటీ దాటనివ్వలేదు. ఇండ్ల నుంచి బయటికి రాలేక ముంపు బాధితులు సాయం కోసం తెలిసిన వారికి కాల్చేసి వేడుకుంటున్నారు.
