మరో 3 నెలలు స్పెషల్ ఆఫీసర్ల పాలన పెట్టేందుకు సర్కార్ యోచన
ఆ లోపు డివిజన్ల డీలిమిటేషన్పై కసరత్తు
హైదరాబాద్, వెలుగు: వరంగల్, ఖమ్మం మున్సిపల్ కార్పొరేషన్ ఎన్నికలను మూడు నెలలు వాయిదా వేయాలని రాష్ట్ర సర్కార్ భావిస్తోంది. అంతవరకు కార్పొరేషన్ల పాలనా బాధ్యత చూసేందుకు స్పెషల్ ఆఫీసర్లను నియమించాలని యోచిస్తోంది. మార్చి రెండో వారంతో రెండు కార్పొరేషన్ల పాలకమండలళ్ల గడువు ముగియనుంది. ఆ లోపు ఎన్నికలు పెట్టాలంటే జనవరి మూడో వారం నుంచే రాష్ట్ర ఎన్నికల సంఘం కసరత్తు చేయాల్సి ఉంటుంది. అయితే, ఇప్పటిదాకా ఎన్నికల నిర్వహణపై ప్రభుత్వం నుంచి తమకు ఎలాంటి సమాచారం రాలేదని ఎన్నికల సంఘం అధికారులు చెబుతున్నారు.
వరంగల్లో 8, ఖమ్మంలో 10 కొత్త డివిజన్లు!
వరంగల్, ఖమ్మం కార్పొరేషన్లలో డివిజన్లు పెంచాలన్న డిమాండ్ వినిపిస్తోంది. దానిపై ఇప్పుడు ప్రభుత్వం కసరత్తులు చేస్తున్నట్టు తెలుస్తోంది. ఫిబ్రవరిలో డీలిమిటేషన్ కమిటీని ఏర్పాటు చేయాలని భావిస్తోంది. కొత్త డివిజన్ల డిమాండ్ మేరకు ముసాయిదా డివిజన్లను కమిటీ ప్రకటిస్తుంది. ప్రజలు, రాజకీయ పార్టీల అభిప్రాయాలను తీసుకున్న తర్వాత తుది జాబితాతో కొత్త డివిజన్లను ఏర్పాటు చేస్తారు. వరంగల్లో ప్రస్తుతం 58 డివిజన్లు ఉండగా, మరో 8 డివిజన్లను.. ఖమ్మంలో 50 ఉండగా, కొత్తగా 10 డివిజన్లు ఏర్పాటు చేయాలని సర్కార్ యోచిస్తోంది.
ఇవీ చదవండి..
