హనుమకొండ, వెలుగు: బ్రాండెడ్ కంపెనీల పేరుతో నకిలీ ఎలక్ట్రికల్ వైర్లు, స్విచ్ ల దందా చేస్తున్న వ్యక్తిని వరంగల్ టాస్క్ ఫోర్స్ పోలీసులు పట్టుకున్నారు. అతడి నుంచి వివిధ బ్రాండెడ్ కంపెనీల పేరుతో ఉన్న రూ.28.6లక్షల విలువైన నకిలీ వైర్లు, స్విచ్లను స్వాధీనం చేసుకున్నారు. పోలీసుల వివరాల ప్రకారం.. వరంగల్ అండర్ బ్రిడ్జి ఏరియా శివనగర్ కు చెందిన చౌదరి ధనరావు కొంతకాలంగా శ్రీపార్వతి ఎలక్ట్రికల్స్ పేరున భవన నిర్మాణ రంగంలో వాడే ఎలక్ట్రికల్ వైర్లు, స్విచ్ ల బిజినెస్ చేస్తున్నాడు.
పెద్ద మొత్తంలో డబ్బులు సంపాదించాలనే దురాశతో బ్రాండెడ్ కంపెనీల పేరుతో నకిలీ వైర్లు, స్విచ్లు అమ్ముతున్నాడు. వరంగల్ టాస్క్ఫోర్స్ పోలీసులకు సమాచారం అందగా, మంగళవారం సాయంత్రం షాప్లో తనిఖీలు నిర్వహించి, వస్తువులను పరిశీలించి, విచారించారు. దీంతో ఆయన అసలు వాస్తవాన్ని ఒప్పుకున్నాడు. అనంతరం షాప్ లో ఉన్న రూ.28,67,762 విలువైన వివిధ బ్రాండెడ్ కంపెనీల పేరుతో ఉన్న నకిలీ వైర్లు, స్విచ్ లను గుర్తించి సీజ్ చేశారు. విచారణ నిమిత్తం నిందితుడితోపాటు స్వాధీనం చేసుకున్న సామగ్రిని మిల్స్ కాలనీ పోలసులకు అప్పగించారు.
