హనుమకొండ, వెలుగు : ఎలాంటి తయారీ, ఎక్స్ పైరీ డేట్ లేకుండా ఖారా, బూందీ, ఇతర ఆహార పదార్థాలు అమ్ముతున్న షాప్ పై వరంగల్ టాస్క్ ఫోర్స్పోలీసులు రైడ్ చేశారు. రూ.48 వేల విలువ చేసే సామగ్రిని స్వాధీనం చేసుకున్నారు. పూర్తి వివరాలు ఇలా.. వరంగల్ ఎస్ఆర్ఆర్ తోటకు చెందిన ప్రిన్స్ మువేంద్ర సన్ బ్రాండ్ పేరున ఖారా, బూందీ, చెకోడి ఇతర పిండిపదార్థాలు తయారు చేస్తూ నగరంలోని బెకరీలు, కిరాణ షాపులకు సరఫరా చేస్తున్నాడు.
సరైన లైసెన్స్ లేకపోవడంతోపాటు తయారీ, ఎక్స్పైరీ డేట్ లేకుండానే వాటిని ప్యాక్ చేసి అమ్ముతున్నాడు. సమాచారం అందుకున్న టాస్క్ ఫోర్స్ పోలీసులు ఫుడ్ ఇన్స్పెక్టర్ ఆధ్వర్యంలో తనిఖీలు చేపట్టి రూ.48 వేల విలువైన సరుకును సీజ్ చేశారు. తనిఖీల్లో టాస్క్ఫోర్స్‌ సీఐ ఎం.రంజిత్, ఎస్సై వి.దిలీప్, వరంగల్ జిల్లా ఫుడ్ ఇన్స్పెక్టర్ రామకృష్ణ తదితరులు పాల్గొన్నారు.
కాగా, గురువారం రాత్రి హనుమకొండ రెడ్డిపురానికి చెందిన రెక్స్ రూబెన్ నడిపిస్తున్న ఏవీడీ స్వీట్స్ కంపెనీలో కూడా తనిఖీలు చేసి రూ.74,280 విలువైన ఖారా, చెకోడీ, పల్లీపట్టీలను సీజ్ చేశారు.
