- బిల్డింగ్స్ ఓనర్లు, నిర్వాహకులకు వాటర్బోర్డు నోటీసులు
- డిసెంబర్ నెలాఖరు వరకు గడువు
- ఆ తర్వాత కఠిన చర్యలు తీసుకునేందుకు సిద్ధం
హైదరాబాద్సిటీ, వెలుగు: అపార్ట్మెంట్లు, హాస్టల్స్, హోటల్స్ ఇతర బహుళ అంతస్తుల భవన యజమానులు తప్పనిసరిగా సీవరేజీ పైప్లైన్కు, మ్యాన్హోల్ కు మధ్య సిల్ట్ చాంబర్లు నిర్మించుకోవాలని వాటర్బోర్డు ఎండీ అశోక్రెడ్డి చెప్పారు. నిర్మించుకోని వారికి నోటీసులు ఇచ్చి చర్యలు తీసుకోవాలని అధికారులకు స్పష్టం చేశారు. సిల్ట్చాంబర్లు లేకపోవడంతో వ్యర్థాలు అడ్డం పడి మ్యాన్హోళ్లు పొంగుతున్నాయన్నారు.
ఇక నుంచి అపార్ట్మెంట్లు, హోటళ్లు, వాణిజ్య సముదాయాలు, హాస్టళ్లు, హాస్పిటల్స్, బేకరీల నిర్వాహకులు తప్పని సరిగా తమ భవనం నుంచి వెళ్లే సీవరేజీ లైన్కు మ్యాన్హోల్కు మధ్య సిల్ట్చాంబర్ నిర్మించుకునేలా నోటీసులు జారీ చేయాలని ఆదేశించారు. వేలాది మంది మ్యాన్హోల్స్ పొంగడానికి, సీవరేజీ లైన్లకు లీకేజీలు ఏర్పడానికి వ్యర్థాలు పూడుకుపోవడం, అడ్డం పడడమేనని కారణమని అధికారులు గుర్తించారు. 90 రోజుల స్పెషల్ డ్రైవ్లో భాగంగా 50 వేలకు పైగా మ్యాన్హోల్స్ లో పూడిక తీశామని ఎండీ అశోక్రెడ్డి చెప్పారు.
సిల్ట్ చాంబర్ ఉంటే..
అపార్ట్మెంట్స్, హోటల్స్, రెస్టారెంట్స్, హాస్టల్స్, హాస్పిటల్స్, మాల్స్, బేకరీల నుంచి వచ్చే మురుగు నీరంతా ముందుగా సిల్ట్ చాంబర్లోకి చేరుతుంది. అందులో ఏవైనా ఘనపదార్థాలుంటే అక్కడ వడబోత జరుగుతుంది. కేవలం మురుగు నీరు మాత్రమే డ్రైనేజీ పైప్లైన్లో కలుస్తుంది. సిల్ట్చాంబర్లు ఉంటే డ్రైనేజీ కాల్వలు, పైప్లైన్లలో ప్రవాహానికి ఎలాంటి ఆటంకం ఉండదు.
నీటిలో కరగని వ్యర్థాలను ఎక్కడికక్కడ కట్టడి చేసేందుకు అవకాశం ఉంటుంది. సిల్ట్చాంబర్ల నిర్మాణానికి డిసెంబర్ ఆఖరు వరకు గడువు ఇవ్వాలని వాటర్బోర్డు అధికారులు భావిస్తున్నారు. అప్పటికీ నిర్మించుకోని వారిపై కఠిన చర్యలు తీసుకుంటామని చెబుతున్నారు.
