- సాగుకు 313 టీఎంసీల నీటి విడుదలకు సర్కార్ నిర్ణయం
- కృష్ణా బేసిన్లో 14.05 లక్షలు.. గోదావరి కింద 17.95 లక్షల ఎకరాలకు నీళ్లు
హైదరాబాద్, వెలుగు: ప్రస్తుత ఖరీఫ్ సీజన్లో వివిధ ప్రాజెక్టుల నుంచి 32 లక్షల ఎకరాలకు సాగునీరివ్వాలని రాష్ట్ర సర్కారు నిర్ణయించింది. మొత్తం 313 టీఎంసీల నీటిని సాగు అవసరాల కోసం ఇవ్వాలని నిర్ణయం తీసుకుంది. ఇప్పటికే కృష్ణా బేసిన్లోని ప్రాజెక్టులన్నీ నిండడంతో ఆయకట్టుకు సాగునీటిని విడుదల చేయాలని భావిస్తున్నది.
శనివారం రాష్ట్రస్థాయి సాగునీటి విడుదల ప్రణాళిక కమిటీ(స్కైవమ్) చైర్మన్ ఈఎన్ సీ అనిల్ కుమార్ నేతృత్వంలో మీటింగ్ నిర్వహించారు. వరి, ఆరుతడి పంటలకు నీళ్లు అందించాలని నిర్ణయించారు. కృష్ణా బేసిన్లోని ప్రాజెక్టుల కింద 14.05 లక్షల ఎకరాలకు 125 టీఎంసీలు, గోదావరి బేసిన్లో 17.95 లక్షల ఎకరాలకు 188 టీఎంసీల నీటిని విడుదల చేయాలని నిర్ణయం తీసుకున్నారు. అయితే, ప్రస్తుతం గోదావరి బేసిన్లో సరైన వరదలు లేకపోవడం.. ప్రధాన ప్రాజెక్టుల్లో నిల్వ లేకపోవడంతో 15 రోజుల తర్వాత మరోసారి సమావేశం నిర్వహించనున్నారు.
