ప్రిన్సిపాల్‌‌తో వేగలేకపోతున్నామని సౌకర్యాలపై ప్రశ్నిస్తే తమకు భవిష్యత్‌ లేకుండా చేస్తానని బెదిరిస్తున్నారని భద్రాద్రికొత్తగూడెం జిల్లా పాల్వంచలోని మెడికల్ కాలేజీ ఫస్ట్,సెకండ్ఇయర్ స్టూడెంట్లు వాపోయారు. మంగళవారం ప్రిన్సిపాల్‌‌ను సస్పెండ్ చేయాలని డిమాండ్ చేస్తూ కాలేజీ ఎదుట ఆందోళనకు దిగారు. ఈ సందర్భంగా వారు మాట్లాడుతూ.. తమ సమస్యలు పరిష్కరించాలని పలుమార్లు ప్రిన్సిపాల్దృష్టికి తీసుకెళ్లినా పట్టించుకోవడం లేదని మండిపడ్డారు. ఏ కాలేజీలో లేనివిధంగా బస్ఫీజు రూ. 20 ఇవ్వాలని వేధిస్తున్నారని ఆరోపించారు. కాలేజీ ఫీజు రూ. 26 వేలు ఉంటే రూ. 65 వేలు వసూలు చేస్తున్నారని, దీనిపై ప్రశ్నిస్తే బెదిరింపులకు దిగుతున్నారని వాపోయారు. సెకండ్ఇయర్క్లాసులు ప్రారంభమై మూడు నెలలు దాటుతున్నా ఇప్పటి వరకు ఒక్క ప్రాక్టికల్ ఎగ్జామ్‌‌కూడా జరగలేదన్నారు. టిఫిన్, భోజనం క్వాలిటీగా ఉండడం లేదని చెప్పినా పట్టించుకోవడం లేదని మండిపడ్డారు. హాస్టల్‌‌లో తమకు వెసులుబాటుగా ఉండే దుస్తులు వేసుకుంటే అసభ్యకరంగా మాట్లాడుతున్నారని పలువురు గర్ల్స్‌ ఆవేదన వ్యక్తం చేశారు. డీఎంఈ స్థాయిలో సమగ్ర విచారణ చేసి ప్రిన్సిపాల్‌‌ను సస్పెండ్చేయాలని డిమాండ్ చేశారు.
రిపోర్టర్లను అడ్డుకున్న సిబ్బంది
మెడికల్కాలేజీలో స్టూడెంట్స్ధర్నా చేస్తున్న విషయం తెలుసుకున్న రిపోర్టర్లు న్యూస్ కవరేజ్ కోసం వెళ్తే సెక్యూరిటీ సిబ్బంది గేట్వద్దే అడ్డుకున్నారు. రిపోర్టర్లను కాలేజీలోకి రానివ్వొద్దని తమకు ఆదేశాలున్నాయని వాళ్లు చెప్పారు. దీంతో స్టూడెంట్లు కాలేజీ లోపలి నుంచి గేట్బయటకు వచ్చి ధర్నా చేశారు. సమాచారం అందుకున్న పోలీసులు లోపలికి వెళ్లాలని స్టూడెంట్లకు సర్దిచెప్పే ప్రయత్నం చేశారు.
డీఎంఈ విచారణ
రెండు రోజులుగా స్టూడెంట్లు ఆందోళన చేస్తుండడంతో డైరెక్టర్‌ ఆఫ్‌ మెడికల్ ఎడ్యుకేషన్‌(డీఎంఈ) ఆఫీసర్లు విచారణకు ఆదేశించారు. దీంతో ఖమ్మం మెడికల్కాలేజీ ప్రిన్సిపాల్ఆధ్వర్యంలో నలుగురు బృందం మంగళవారం విచారణ చేపట్టారు. టీమ్‌ సభ్యులు స్టూడెంట్ల నుంచి వివరాలు సేకరించడంతో పాటు మెస్‌‌ను పరిశీలించారు. కాలేజీ ప్రిన్సిపాల్ లక్ష్మణ్‌ నుంచి వివరణ తీసుకున్నారు.
విచారణకు కమిటీ ఏర్పాటు
మెడికల్కాలేజీలో నెలకొన్న సమస్యలు, స్టూడెంట్ల ఆందోళనలపై విచారణ జరిపేందుకు జడ్పీ సీఈవో ఎస్. ప్రసూనరాణి అధ్యక్షతన చీఫ్ ప్లానింగ్ఆఫీసర్ శ్రీనివాసరావు, హార్టికల్చర్ ఆఫీసర్ కె. సూర్యనారాయణ సభ్యులుగా కమిటీని ఏర్పాటు చేసినట్లు కలెక్టర్డాక్టర్ప్రియాంక మంగళవారం ఓ ప్రకటనలో తెలిపారు. కాలేజీతో పాటు హాస్టల్‌‌లో కనీస సౌకర్యాలు లేకపోవడం, క్రీడలు, సాంస్కృతిక కార్యక్రమాల్లో పాల్గొనేందుకు పర్మిషన్‌ ఇవ్వకపోవడం, క్రమశిక్షణ పేరుతో రాత్రి సమయాల్లో హాస్టల్ క్యాంపస్లోకి వెళ్లి వీడియోలు రికార్డు చేయడం, ప్రశ్నిస్తే దురుసుగా ప్రవర్తించడం లాంటి ఫిర్యాదులపై ఈ కమిటీ విచారణ చేస్తుందని పేర్కొన్నారు. ఈ నెల 22న సాయంత్రం 5 గంటల్లో నివేదిక అందజేయాలని ఆమె ఆదేశించారు.
