హైదరాబాద్సిటీ, వెలుగు: గ్రేటర్ పరిధిలో వచ్చే వేసవిలో నీటి ఎద్దడి రాకుండా ట్యాంకర్ల నిర్వాహకులు ప్రణాళికాబద్ధంగా పని చేయాలని మెట్రోవాటర్ బోర్డు ఎండీ అశోక్ రెడ్డి ఆదేశించారు. బోర్డు పరిధిలోని ట్యాంకర్లతో పాటు ప్రైవేట్ ట్యాంకర్ల నిర్వాహకులతో ఆయన భేటీ అయ్యారు. గతేడాది నగరంలోని ఐదు డివిజన్ల పరిధిలో నీటి సమస్యలకు గల కారణాలను అధికారులను అడిగి తెలుసుకున్నారు.
ప్రస్తుతం బోర్డు పరిధిలో 650 ట్యాంకర్లు ఉండగా మరిన్ని ట్యాంకర్లను ఏర్పాటు చేసే విషయంపై అధికారులు ఆలోచించాలన్నారు. ఈ ఏడాది 90 రోజుల ప్రణాళికలో భాగంగా ఇంకుడు గుంతలపై ప్రజల్లో అవగాహన కార్యక్రమాలు చేపట్టాలన్నారు. ఇంకుడు గుంతలను ఏర్పాటు చేసుకోని ఇండ్లకు వేసవిలో ట్యాంకర్లను ఆర్డర్ ఇస్తే రెట్టింపు ఛార్జీలు వసూలు చేయాలన్నారు.
