- ఫస్ట్ కేబినెట్ భేటీలోనే వాటికి ఆమోద ముద్ర వేస్తం
- ఆయనపై మోదీ ఎందుకు విచారణ జరిపిస్తలే
- రాష్ట్రంలో కేసీఆర్ను, ఢిల్లీలో మోదీని గద్దె దించుతాం
- బీఆర్ఎస్, బీజేపీ, ఎంఐఎం.. మూడు పార్టీలు ఒక్కటే
- సంగారెడ్డి, జోగిపేట, కామారెడ్డి సభల్లో వ్యాఖ్యలు
సంగారెడ్డి/కామారెడ్డి, వెలుగు: కాంగ్రెస్ ప్రకటించిన ఆరు గ్యారంటీల అమలుకు తానే గ్యారంటీ అని కాంగ్రెస్ అగ్రనేత రాహుల్ గాంధీ హామీ ఇచ్చారు. రాష్ట్రంలో కాంగ్రెస్ ప్రభుత్వం ఏర్పడగానే ఆరు గ్యారంటీలకు మొదటి కేబినెట్ భేటీలోనే ఆమోదముద్ర వేస్తామని స్పష్టం చేశారు. వాటికి చట్టబద్ధత కల్పించి శాశ్వత పథకాలుగా మారుస్తామని చెప్పారు. కేసీఆర్ సర్కార్ దోచిందంతా కక్కించి ప్రజలకు పంచుతామని వెల్లడించారు. సీఎం కేసీఆర్, ప్రధాని మోదీ ఒక్కటి కావడం వల్లే కేసీఆర్ అవినీతిపై సీబీఐ, ఈడీ సోదాలు జరగడం లేదని రాహుల్ అన్నారు. తెలంగాణలో కేసీఆర్ను, ఢిల్లీలో మోదీని గద్దె దించుతామని చెప్పారు.
ఆదివారం సంగారెడ్డి, జోగిపేట, కామారెడ్డి బహిరంగ సభల్లో రాహుల్గాంధీ మాట్లాడారు. రాష్ట్ర సంపదను కేసీఆర్ కుటుంబం దోచుకున్నదని ఆరోపించారు. కాళేశ్వరం ప్రాజెక్టు ద్వారా కేసీఆర్ ఫ్యామిలీ లక్ష కోట్ల కుంభకోణం చేసిందని, ఆ ప్రాజెక్టు క్వాలిటీని తాను స్వయంగా పరిశీలించానని, ప్రాజెక్టు కట్టిన కొన్నేండ్లకే పునాదులు, పిల్లర్లు దెబ్బతిన్నాయని తెలిపారు. ‘‘కేసీఆర్ అవినీతి, అక్రమాలతో పాలన చేస్తుంటే.. మోదీ ప్రజల్లో కులమత భేదాలు సృష్టించి అధికార దాహం తీర్చుకుంటున్నరు” అని మండిపడ్డారు. ‘‘నేను మోదీకి వ్యతిరేకంగా పోరాడుతున్నానని నా మీద 24 కేసులు పెట్టారు.. 5 రోజుల పాటు రోజుకు గంటల కొద్దీ నన్ను విచారించారు. నేను ఒక ప్రశ్న అడుగుతున్నా.. కేసీఆర్, మోదీ మధ్య అంతర్గతంగా సయోధ్య కుదరకపోయుంటే ఈ పాటికి కేసీఆర్ పీఠానికి ముప్పు వచ్చేది కదా. కేసీఆర్ అవినీతిపై మోదీ ఎందుకు విచారణ జరిపించడం లేదు?” అని ఆయన ప్రశ్నించారు.
ఆ మూడు పార్టీలు ఒక్కటే
బీజేపీ, బీఆర్ఎస్, ఎంఐఎం .. ఈ మూడు పార్టీలు ఒక్కటేనని రాహుల్ గాంధీ ఆరోపించారు. పార్లమెంట్లో మోదీ ఏ చట్టాలు తీసుకొచ్చినా వాటిని కేసీఆర్ సమర్థిస్తారని, కాంగ్రెస్ఒక్కటే బీజేపీ, బీఆర్ఎస్ను గల్లీలో, ఢిల్లీలో ఓడించి అధికారం చేపట్టడం ఖాయమని ధీమా వ్యక్తం చేశారు. ‘‘కాంగ్రెస్ పార్టీ ఏం చేసిందని కేసీఆర్ అంటున్నడు. కేసీఆర్.. గుర్తుంచుకో.. నువ్వు ఏ రోడ్లమీద నడుస్తున్నవో ఆ రోడ్లను కాంగ్రెస్ వేసింది. నువ్వు చదువుకున్న స్కూళ్లు, కాలేజీలను కాంగ్రెస్సే కట్టిచ్చింది. హైదరాబాద్ను విశ్వనగరంగా మార్చింది కాంగ్రెస్ పార్టీనే’’ అని చెప్పారు. ఈ ప్రచార సభల్లో కర్నాటక డిప్యూటీ సీఎం శివకుమార్, కాంగ్రెస్ పార్టీ రాష్ట్ర ఇన్చార్జ్ మాణిక్రావ్ ఠాక్రే, పీసీసీ చీఫ్ రేవంత్రెడ్డి, సీనియర్ నేత కేసీ వేణుగోపాల్, అభ్యర్థులు షబ్బీర్అలీ, ఏనుగు రవీందర్రెడ్డి, మదన్మోహన్రావు, దామోదర రాజనర్సింహ, జగ్గారెడ్డి, ఏఐసీసీ సభ్యుడు
కుసుమ్ కుమార్ తదితరులు పాల్గొన్నారు.
ఢిల్లీలో బీజేపీకి బీఆర్ఎస్ సపోర్ట్ చేస్తుంటే.. తెలంగాణలో బీఆర్ఎస్కు బీజేపీ లోపాయికారిగా మద్దతు ఇస్తున్నది. ఆ రెండు పార్టీలకు ఎంఐఎం తొత్తుగా వ్యవహరిస్తున్నది. కాంగ్రెస్ పోటీ చేసే స్థానాల్లో బీఆర్ఎస్ కావాలనే ఎంఐఎంను బరిలోకి దింపుతున్నది. అందుకే రాష్ట్రంలో కేసీఆర్ ఎన్ని అవినీతి, అక్రమాలు చేసినా మోదీ మౌనంగా ఉంటున్నరు. కాంగ్రెస్ ను ఓడించడమే బీజేపీ, బీఆర్ఎస్ లక్ష్యంగా పెట్టుకున్నయ్.
రాహుల్ గాంధీ
