- వర్సిటీ వ్యవహారాల్లో నవీన్ మిట్టల్ పెత్తనమేంది?
- రిజిస్ట్రార్గా యాదగిరిని మార్చినప్పటి నుంచి టార్గెట్
- ఆయన ఆర్డర్ తేకపోతే కేసు నా దగ్గర ప్రతి పైసా చెల్లింపు తాలూకు నోట్ఫైల్ ఉంది
- ప్రెస్ మీట్లో తెలంగాణ వర్సిటీ వీసీ రవీందర్ గుప్తా
- దూసుకొచ్చిన విద్యార్థి నేతలు
నిజామాబాద్, వెలుగు: అటానమస్ బాడీ అయిన తెలంగాణ యూనివర్సిటీ వ్యవహారాల్లో ఉన్నత విద్యా శాఖ కమిషనర్నవీన్ మిట్టల్పెత్తనం ఏమిటని వీసీ రవీందర్ గుప్తా ప్రశ్నించారు. యాదగిరి రిజిస్ర్టార్ పదవిలో కొనసాగించనందుకే తనను టార్గెట్ చేశారన్నారు. జిల్లా మంత్రి, ఎమ్మెల్యేలు, ఎమ్మెల్సీలు సహకరించడం లేదని ఆరోపించారు. ఇతర వర్సిటీలకు అక్కడి ప్రజాప్రతినిధులు గవర్నమెంటు నుంచి నిధులు తెస్తున్నారని ఇక్కడా పరిస్థితి లేదన్నారు. శనివారం ఆయన వర్సిటీలోని తన కార్యాలయంలో ప్రెస్మీట్ నిర్వహించి మాట్లాడారు.
హెచ్వోడీలు అడిగినందుకే నియామకాలు
వర్సిటీ అవసరాలు కౌంట్లోకి తీసుకొని రూ.498 రోజువారీ చెల్లింపులతో ఔట్సోర్సింగ్ నియామకాలు చేశామని వీసీ వెల్లడించారు. ప్రతి హెచ్వోడీ, ప్రొఫెసర్లు సిబ్బంది కావాలని అడిగారన్నారు. ప్రతి పైసా చెల్లింపు తాలూకు నోట్ఫైల్ఉందన్నారు. తెలంగాణ వర్సిటీ ఒక్కటే కాదని ఉస్మానియాలో 600, కాకతీయలో 300, మహాత్మాగాంధీ వర్సిటీలో 150 మందిని నియమించారన్నారు.
యాదగిరికి రెండు రోజులు టైం ఇస్తున్నా...
రిజిస్ట్రార్ బాధ్యతను యాదగిరి ఈ నెల తొమ్మిదో తారీఖున శివశంకర్కు అప్పగించారని, ఒకసారి వదులుకున్నాక ఈసీ మీటింగ్ తీర్మానం చేశారని మళ్లీ రావడం కుదరదన్నారు. తీర్మాణం, ఆర్డర్ రెండూ వేరన్నారు. ఈ విషయాన్ని తాను యాదగిరికి ఫోన్లో చెప్పినా వినలేదన్నారు. 19 తారీకు ఈసీ తీర్మానాలపై హైకోర్టు తాజాగా స్టే విధించినందున ఆయన రిజిస్ట్రార్ బాధ్యతలు చెల్లవన్నారు. అయినా ఆర్డర్ తెచ్చుకోవడానికి యాదగిరికి రెండు రోజులు ఛాన్స్ ఇస్తున్నానని, ఆ తర్వాత కుర్చీలో కూర్చుంటే పోలీసు కేసు పెడతానన్నారు. పది రోజులు తాను నియమించిన విద్యావర్ధిని రిజిస్ట్రార్గా ఉంటారని, తర్వాత ఓయూ నుంచి ఒకరిని నియమించుకుంటామన్నారు. అయితే, అక్కడే ఉన్న విద్యావర్థిని తాను రిజిస్ట్రార్గా ఉండనని చెప్పారు.
గెట్అవుట్ అని అవమానించారు
గత 17 నెలల నుంచి ఈసీ మీటింగ్ ఎందుకు పెట్టలేదని వీసీని విలేకరులు ప్రశ్నించగా అన్ని వర్సిటీలకు ఈసీ సభ్యుడైన నవీన్ మిట్టల్కు తాను 12 సార్లు దీని గురించి చెప్పేందుకు ఫోన్ చేశానన్నారు. రాష్ట్ర ఉన్నత విద్యా శాఖ కమిషనర్ అయినందున తెలంగాణ వర్సిటీ ఈసీ మీటింగ్ నిర్వహణకు సమయం ఇవ్వాలని కోరినా పట్టించుకోలేదన్నారు. ఈ నెల 19 తారీఖు అజెండాను రిజిస్ట్రార్ హోదాలో విద్యావర్థినితో తయారు చేయించామని, ఆమె మీటింగ్కు వెళ్తే 'గెట్ అవుట్' అంటూ అవమానించారన్నారు. విద్యావర్థిని ప్రొఫెసర్ అన్నది కూడా గుర్తించలేదన్నారు. ఆమెను సస్పెండ్ చేసిన తీర్మానం చెల్లదని వీసీ చెప్పగా తనకు అలాంటి ఆర్డర్ రాలేదని విద్యావర్థిని వివరించారు.
గవర్నర్ను కలిసి చెబుతా..
19వ తేదీ ఈసీ మీటింగ్ తీర్మానాలకు మాత్రమే హైకోర్టు స్టే ఇచ్చిన విషయాన్ని విలేకరులు ప్రస్తావించి..26 తేదీ తీర్మానాల రద్దుకు కోర్టులో మరో పిటిషన్ వేస్తారా? అని ప్రశ్నించగా 26 తేదీ తీర్మానాలు కూడా చెల్లవన్నారు. నవీన్ మిట్టల్ఈసీ సభ్యులతో బలవంతంగా సంతకాలు తీసుకొని వింత తీర్మానాలు చేయించారన్నారు. అన్ని విషయాలను తాను గవర్నర్ తమిళిసైకి చెప్పబోతున్నానన్నారు. ఉద్యోగాలు కోల్పోయిన 149 మందిలో కొందరు వీసీని కలువగా కోర్టు స్టే గురించి చెప్పి ఉద్యోగాలు ఎటూ పోవని సర్ది చెప్పారు.
విద్యార్థుల నినాదాలు
ఏబీవీవీ, పీడీఎస్యూ విద్యార్థి సంఘాల నాయకులు సంతోష్, శివ నేతృత్వంలో ప్రెస్మీట్ నిర్వహిస్తున్న గదిలోకి చొచ్చుకు వచ్చి వీసీ గోబ్యాక్ అంటూ నినాదాలు చేశారు. టేబుల్పైకి ఎక్కి గందరగోళం చేయగా వీసీ పోలీసులకు సమాచారమిచ్చారు. రెండు సార్లు వీసీ ఛాంబర్లోకి వచ్చిన విద్యార్థులను సీఐ కృష్ణ, ఎస్ఐ గణేశ్అదుపులోకి తీసుకుని పోలీస్స్టేషన్కు తరలించారు.
