ప్రజాగాయకుడి గొంతు ఇక వినపడదు. ఎన్నో అద్భుతమైన పాటలతో అలరించిన గద్దర్ (Gaddar) ... కొన్ని సినిమాల్లో నటించారు. గత కొంత కాలంగా అనారోగ్యంతో బాధపడుతున్న ఆయన హైదరాబాద్ అపోలో ఆస్పత్రిలో ఆదివారం (ఆగస్టు6)న తుదిశ్వాశ విడిచారు. అయితే ఆయన ఈ మధ్య కాలంలో ఓ మూవీలో నటించారు. అదే ఆయనకు చివరి సినిమా అయింది.
సత్యారెడ్డి నటిస్తూ స్వీయ దర్శకత్వంలో తీసిన సినిమా పేరు ఉక్కు సత్యాగ్రహం. ఈ సినిమాను విశాఖ స్టీల్‌ ప్లాంట్‌ గురించి జనం ఎంటర్‌టైన్‌మెంట్‌ సంస్థ నిర్మించింది. ఈ మధ్యే షూటింగ్ పూర్తి చేసుకొని పోస్ట్ ప్రొడక్షన్ కార్యక్రమాలు మొదలుపెట్టింది. ఇందులో గద్దర్ కీలకపాత్ర పోషించారు. ఈ సినిమా ప్రీ రిలీజ్ వేడుకల్ని త్వరలో వైజాగ్‌లోని ఆర‍్కే బీచ్‌లో నిర్వహిస్తామని చిత్రబృందం ప్రకటించింది. ఓ ప్రముఖ వ్యక్తి ఈ వేడుకకు హాజరవుతారని అన్నారు. ఇలా అందరూ సినిమా హడావుడిలో ఉన్నారు. ఇప్పుడు సడన్‌గా గద్దర్ మరణించడం అందరినీ దిగ్భ్రాంతికి గురి చేసింది. ఉక్కు సత్యాగ్రహం సినిమా యూనిట్ ఆయన కుటుంబానికి సానుభూతి తెలియజేశారు.
