మోత్కుపల్లి వీడితే నష్టమెంత?.. బీఆర్ఎస్ లీడర్ల లెక్కలు

రెండు దశాబ్దాల తర్వాత మళ్లీ కాంగ్రెస్ గూటికి మోత్కుపల్లి!
ఈసారి తుంగతుర్తి నుంచి పోటీ చేసేందుకు ప్రయత్నం

యాదాద్రి, వెలుగు : మాజీ మంత్రి మోత్కుపల్లి నర్సింహులు బీఆర్ఎస్ను వీడి కాంగ్రెస్లో చేరడం ఖాయమైపోయింది. అయితే, ఆయన పార్టీని వీడడం వల్ల ఆలేరు నియోజకవర్గంపై కచ్చితంగా ప్రభావం పడుతుందని, అయితే అది ఏ స్థాయిలో పడుతుంది, ఎంత నష్టం జరుగుతుందన్న లెక్కల్లో బీఆర్ఎస్ లీడర్లు మునిగిపోయారు. బీఆర్ఎస్లో చేరినప్పటి నుంచి మోత్కుపల్లి అసంతృప్తిగానే ఉన్నారు. సుదీర్ఘ కాలం మంత్రిగా పనిచేసిన ఆయనకు బీఆర్ఎస్ లో తగిన ప్రాధాన్యం దక్కలేదు. టీడీపీ నుంచి బహిష్కరణకు గురైన మోత్కుపల్లి 2018 ఎన్నికల తర్వాత బీజేపీలో చేరారు. కానీ, ఆ పార్టీలో ఇమడలేక రాజీనామా చేశారు. 2021లో బీఆర్ఎస్లో చేరారు. కేసీఆర్ ఆహ్వానం మేరకే బీఆర్ఎస్లో చేరానని మోత్కుపల్లి చెప్పుకున్నారు. కేసీఆర్ కూడా మోత్కుపల్లికి మొదట్లో గౌరవం ఇచ్చారు. ఆ సమయంలోనే దళితబంధు చైర్మన్ ఇస్తారని ప్రచారం జరిగింది. అయితే మోత్కుపల్లిని సీఎం కేసీఆర్ దూరం పెట్టారు. ప్రగతి భవన్కు ఆయన స్వయంగా ఫోన్ చేసి అపాయింట్మెంట్ అడిగినా.. ఇస్తామని చెప్పి రెండు రోజులు దాటవేశారు. ప్రగతి భవన్ నుంచి ఫోన్ కోసం ఎదురు చూసిన ఆయనకు సీఎం నుంచి రిప్లయ్ రాలేదు. ఆగస్టులో అభ్యర్థులను ప్రకటించిన కేసీఆర్.. మోత్కుపల్లిని పరిగణనలోకి తీసుకోలేదు. దీంతో ఆయన అనుచరులు యాదగిరిగుట్టలో సమావేశం ఏర్పాటుచేసి మోత్కుపల్లికి టికెట్ ఇవ్వాలని కేసీఆర్కు లేఖ రాశారు. కాగా, బీఆర్ఎస్లో అసంతృప్తిగా కొనసాగుతున్న ఆయనకు కాంగ్రెస్ నుంచి ఆహ్వానం వచ్చిందని మోత్కుపల్లి సన్నిహితులు చెబుతున్నారు. ఆ తర్వాతే చంద్రబాబు అరెస్టుపై స్పందించిన మోత్కుపల్లి.. కేసీఆర్పై విమర్శలు గుప్పించారు. అనంతరం కర్ణాటక ఉప ముఖ్యమంత్రి డీకే శివకుమార్తో బెంగళూరులో భేటీ అయ్యారు. ఈ సందర్భంగా కాంగ్రెస్తో తనకున్న అనుబంధంపై మోత్కుపల్లి వివరించినట్టు తెలుస్తోంది. వారిద్దరి మధ్య చర్చలు ఫలించినట్టు సమాచారం. కాంగ్రెస్లో తగిన ప్రాధాన్యం ఇస్తామని డీకే చెప్పారని మోత్కుపల్లి అనుచరులు పేర్కొంటున్నారు.

ఆలేరుపై ప్రభావం

బీఆర్ఎస్ను మోత్కుపల్లి నర్సింహులు వీడడం వల్ల ఆలేరు నియోకవర్గంపై కచ్చితంగా ప్రభావం పడే అవకాశం ఉంది. ఆలేరు నియోజకవర్గంలో 2,20,638 మంది ఓటర్లు ఉండగా ఎస్సీ ఓటర్లు దాదాపు 45 వేల వరకూ ఉన్నారు. బీఆర్ఎస్లో చేరిన తర్వాత ఆయనకు ప్రాధాన్యం ఇవ్వకపోవడంతో పాటు అభ్యర్థుల ఎంపిక సమయంలోనూ పరిగణనలోకి తీసుకోకపోవడంపై ఎస్సీలతో పాటు ఆయన మద్దతుదారులు అసంతృప్తిగా ఉన్నారు. ఇప్పడు ఆయన ఏకంగా బీఆర్ఎస్ పార్టీనే వీడుతుండడంతో కచ్చితంగా అసెంబ్లీ ఎన్నికలపై ప్రభావం పడుతుందని బీఆర్ఎస్ లీడర్లలో కొంత ఆందోళన నెలకొంది. అయితే అది ఏ స్థాయిలో ఉంటుందన్న లెక్కల్లో ఆ పార్టీ లీడర్లు మునిగిపోయారు. కాగా, తుంగతుర్తి ఎస్సీ రిజ్వర్వుడ్గా మారిన తర్వాత 2009లో జరిగిన అసెంబ్లీ ఎన్నికల్లో మోత్కుపల్లి ఆ నియోజకవర్గం నుంచి పోటీచేసి విజయం సాధించారు. 2014 ఎన్నికల్లో ఆయన ఖమ్మం జిల్లా మధిరలో పోటీ చేయడంతో తుంగతుర్తికి దూరమయ్యారు. ఇప్పుడు ఆయన మళ్లీ కాంగ్రెస్లో చేరుతున్నారు. గతంలో తుంగతుర్తి నుంచి గెలిచినందున మళ్లీ అదే నియోజకవర్గం నుంచి పోటీ చేయాలని మోత్కుపల్లి భావిస్తున్నట్టు తెలుస్తోంది.

రెండు దశాబ్దాల తర్వాత

రెండు దశాబ్దాల తర్వాత మోత్కుపల్లి నర్సింహులు కాంగ్రెస్లోకి మళ్లీ చేరబోతున్నారు. తెలుగుదేశం ఆవిర్భావంతో రాజకీయాల్లోకి అడుగుపెట్టిన ఆయన.. ఆలేరు అసెంబ్లీ నుంచి టీడీపీ, కాంగ్రెస్, ఇండిపెండెంట్ అభ్యర్థిగా మొత్తం ఐదుసార్లు పోటీ చేసి గెలిచారు. 1991లో నంద్యాల నుంచి పీవీ నర్సింహారావుపై ఇండిపెండెంట్గా పోటీచేసి ఓడిపోయారు. నిత్యం కాంగ్రెస్ను విమర్శించే మోత్కుపల్లి.. విధిలేని పరిస్థితుల్లో 1999లో అదే పార్టీ నుంచి పోటీచేసి గెలిచారు. టీడీపీ అధికారంలోకి రావడంతో ఆయన ఆ పార్టీ అనుబంధ సభ్యుడిగా అసెంబ్లీలో కొనసాగారు. 2004, 2008లో టీఆర్ఎస్ అభ్యర్థి కుడుదుల నగేశ్ చేతిలో ఓడిపోయారు. 2009లో టీఆర్ఎస్తో కుదిరిన పొత్తులో భాగంగా తుంగతుర్తి నుంచి మోత్కుపల్లి పోటీచేసి గెలిచారు. 2014లో ఖమ్మం జిల్లా మధిరలో పోటీచేసి ఓడిపోయారు. టీడీపీలో బహిష్కరణకు గురైన మోత్కుపల్లి 2018లో ఆలేరు నుంచి బీఎల్ఎఫ్ అభ్యర్థిగా పోటీచేసి ఓడిపోయారు. అనంతరం బీజేపీలో చేరారు. ఆ పార్టీలో ఇమడలేక బీజేపీకి రాజీనామా చేసి 2021లో బీఆర్ఎస్లో చేరారు. 1999లో కాంగ్రెస్ అభ్యర్థిగా ఆలేరులో గెలిచిన మోత్కుపల్లి రెండు దశాబ్దాల తర్వాత మళ్లీ కాంగ్రెస్లో చేరబేతున్నారు.