ఇన్స్టంట్ మెసేజింగ్ యాప్ వాట్సాప్లో స్టేటస్ పెట్టకుండా రోజు గడవదు చాలామందికి. మంచో, చెడో ఏదైనా సరే అందరికీ తెలియాలంటే స్టేటస్ పెట్టాల్సిందే. ఫొటోలు, వీడియోలు, టెక్స్ట్ ద్వారా స్టేటస్ అప్లోడ్ చేస్తుంటాం. అయితే స్టేటస్కి మరో ఫీచర్ జోడించింది వాట్సాప్. అదే మ్యూజిక్.
వాట్సాప్ యూజర్లు ఇక నుంచి స్టేటస్ పెట్టేటప్పుడు తమ ఫేవరెట్ మ్యూజిక్ను కూడా స్టేటస్కి యాడ్ చేయొచ్చు. దీన్ని ఎలా వాడాలంటే.. స్టేటస్లో పిక్చర్ లేదా టెక్స్ట్ను అప్లోడ్ చేసేటప్పుడు డ్రాయింగ్ ఎడిటర్లో కలర్ ఛేంజ్, టెక్స్ట్, ఎమోజీ, క్రాప్తో పాటు ఎడమవైపు ఈ కొత్త మ్యూజిక్ ఐకాన్ కనిపిస్తుంది.
ఈ ఆప్షన్పై ట్యాప్ చేసి, నచ్చిన సాంగ్స్ లేదా ఆర్టిస్ట్ కోసం సెర్చ్ చేసి దాన్ని సెలక్ట్ చేసుకోవాలి. దాంతో ఆటోమెటిక్గా అది స్టేటస్కు యాడ్ అయిపోతుంది. యూజర్లు వాట్సాప్ స్టేటస్లో ఫొటోలు, వీడియోలు రెండింటికీ ఈ మ్యూజిక్ను యాడ్ చేయొచ్చు. ప్రస్తుతం ఈ ఫీచర్ ఆండ్రాయిడ్ ఫోన్లలో అందుబాటులోకి రానుంది.
మూడు యాప్లలో స్టోరీలుగా..
ఒకే స్టేటస్ని మూడు యాప్లలో స్టోరీలుగా పెట్టుకునే వీలు కల్పించనున్నట్టు తెలిపింది కంపెనీ. వాట్సాప్ స్టేటస్ని ఫేస్బుక్, ఇన్స్టాగ్రామ్లలో కూడా స్టోరీలుగా పెట్టుకోవచ్చట. ఇందుకోసం ఆ యాప్లకు వెళ్లాల్సిన అవసరం లేదు. స్టేటస్ ఆప్షన్లోనే ఫేస్బుక్, ఇన్స్టాగ్రామ్ లింక్స్కి సంబంధించిన ఐకాన్స్ కనిపిస్తాయి.
ముందుగా ఆ యాప్లను ఎనేబుల్ చేసుకోవాలి. ఆ తర్వాత వాటిలో ఏ యాప్లో స్టేటస్ని స్టోరీగా అప్లోడ్ చేయాలనుకుంటున్నారో దాన్ని సెలక్ట్ చేసుకోవాలి. ఒకవేళ వద్దనుకుంటే డిసేబుల్ కూడా చేసుకోవచ్చు. త్వరలోనే ఈ ఫీచర్ అందరికీ అందుబాటులోకి రానుంది.
