ప్రతి ఏటా జూన్ మూడో ఆదివారం ఫాదర్స్ డే సెలబ్రేషన్స్ ప్రపంచమంతా చేసుకుంటారు. ఈ ఏడాది ఫాదర్స్ డే జూన్ 16న వచ్చింది. మనదేశంతో పాటు 80 దేశాలు ఇదే రోజున ఫాదర్స్ డేగా సెలబ్రేట్ చేసుకుంటాయి. కానీ, మరికొన్ని దేశాలు వేరే తేదీల్లో ఈ డేని సెలబ్రేట్ చేసుకుంటాయి. ఆ దేశాలు ఏవి? ఎందుకు ఆ దేశాల్లో డేట్ మారింది? ఆ వివరాలే ఇవి.
స్పెయిన్, ఇటలీ, పోర్చుగల్ దేశాల్లో ఫాదర్స్ డేని మార్చి 19న చేసుకుంటారు. దీన్ని సెయింట్ జోసెఫ్ పండుగ అంటారు. ఆ రోజున కుటుంబం అంతా కలిసి విందు చేస్తారు. స్వీట్లు తినిపించుకుని, చిన్న చిన్న గిఫ్ట్స్ ఇచ్చుకుంటారు. స్పెయిన్లో హ్యాపీ ఫాదర్స్ డే చెప్పాలంటే ‘ఫెలిజ్ డియా డెల్ పాడ్రే’ అని విష్ చేయాలి.
జర్మనీలో ఫాటర్టాగ్
జర్మనీలో ఫాదర్స్ డే రోజు పబ్లిక్ హాలిడే. హాలిడే కావడంతో ఫ్యామిలీతో ఎక్కువ టైం గడుపుతారు. అక్కడి సంప్రదాయం ప్రకారం.. ఆ రోజు రంగురంగుల బట్టలు వేసుకుంటారు. ట్రాన్స్పోర్ట్ వెహికల్ వ్యాగన్ని తీసుకుని, అందులో ఫుడ్ నింపుకుని హైకింగ్ చేసేందుకు వెళ్తారు. ఆ రోజు తండ్రులంతా టీనేజ్ అబ్బాయిల్లా ప్రవర్తిస్తారు. ఫాదర్స్డేని ‘ఫాటర్టాగ్’ అని కూడా పిలుస్తారు.
ఆర్మీ తండ్రుల కోసం..
రష్యాలో ప్రతి ఏటా ఫాదర్స్ డేకి పెద్ద పరేడ్ నిర్వహిస్తారు. ఆర్మీలో ఉన్న తండ్రుల గౌరవార్థం ఇలా చేస్తారు. అయితే, ఫాదర్స్ డే రోజు తండ్రులకు మాత్రమే గిఫ్ట్ ఇస్తుంటారు పిల్లలు. కానీ, రష్యాలో మాత్రం ముఖ్యమైన మగవాళ్లందరికీ ఆడవాళ్లు గిఫ్ట్స్ ఇస్తారు. ఈ డేని తండ్రుల కోసమే కాకుండా అన్నదమ్ములు, కొడుకులు, ఫ్రెండ్స్ ఇలా అందరికీ సంబంధించిందిగా భావిస్తారు. ఒక విధంగా మెన్స్ డేలా చేస్తారన్నమాట.
మెక్సికో మారథాన్
మెక్సికోలో 21కె మారథాన్లో తండ్రులు పార్టిసిపేట్ చేస్తారు. ఆ ఈవెంట్ని ‘కర్రెరా డియా డెల్ పాడ్రె’ అంటారు. ఫ్యామిలీ, ఫ్రెండ్స్ అందరూ కలుసుకుని విందు చేస్తారు. వేడుకల్లో భాగంగా హెల్త్ ఇంపార్టెన్స్ గురించి తెలియజేసే యాక్టివిటీలు ఉంటాయి. అప్పుడే కుటుంబ వ్యవస్థ, దాని విలువల గురించి చెప్పుకుంటారు.
- థాయిలాండ్లో డిసెంబర్ 5న ఫాదర్స్ డే. ఆ రోజు ఎందుకంటే కింగ్భుమిబోల్ బర్త్డే. మొదట్లో ఆ రోజున ట్రెడిషన్స్ ప్రకారం సెలబ్రేట్ చేసేవాళ్లు. ఇప్పుడు అదే నేషనల్ ఫాదర్స్ డేగా మారింది. తండ్రి, తాత, ముత్తాతలపై పూల వర్షం కురిపిస్తారు.
- నెదర్లాండ్స్, బెల్జియం దేశాల్లో ఫాదర్స్ డే రోజు గిఫ్ట్స్ ఇస్తారు.
- స్వీడన్లో నవంబర్ రెండో ఆదివారం ఫాదర్స్ డే చేసుకుంటారు. చేత్తో చేసిన క్రాఫ్ట్స్, టైల వంటివి గిఫ్ట్ ఇస్తారు. ఫ్యామిలీ అంతా కలిసి భోజనం చేసి సరదాగా గడుపుతారు.
- జపాన్లో జూన్ రెండో వారం ఫాదర్స్డే జరుపుకుంటారు. సంప్రదాయ భోజనం తింటారు. బహుమతులు, పూలు ఇచ్చిపుచ్చుకుంటారు.
- బ్రెజిల్ దేశంలో ఫాదర్స్ డేని ఆగస్టు రెండో వారంలో చేసుకుంటారు. ఈ అలవాటు ఎప్పటినుంచో ఉంది. ఆ రోజు పిల్లలంతా తమ తండ్రుల కోసం స్పెషల్గా గ్రీటింగ్ కార్డ్స్ తయారు చేస్తారు. ఫ్యామిలీ మొత్తం కలిసి బార్బెక్యు స్పెషల్స్ చేసుకుని తింటారు.
