- ఏడుగురు చనిపోయాక సూచిక బోర్డు ఏర్పాటు
మెదక్, శివ్వంపేట, వెలుగు: మండలంలోని ఉసిరికపల్లి వద్ద బుధవారం జరిగిన రోడ్డు ప్రమాదంలో ఏడుగురు మృతి చెందడానికి కారు డ్రైవర్ నిర్లక్ష్యంతో పాటు రోడ్డు నిర్మాణ పని ఆలస్యం కూడా ఓ కారణమన్న అభిప్రాయాలు వ్యక్తమవుతున్నాయి. చాలా ఏళ్లుగా అధ్వాన్నంగా మారి వెహికల్స్రాకపోకలకు అసౌకర్యంగా మారిన ఈ రోడ్డు అభివృద్ధికి నిధులు మంజురైనప్పటికీ పనులు ఆలస్యమవుతున్నాయని, ఈ క్రమంలో ప్రమాదాలు జరుగుతున్నాయని ఆరూట్లోని గ్రామాల ప్రజలు చెబుతున్నారు.
ఉసిరికపల్లి చౌరస్తా నుంచి పోతులబోగడ గ్రామం వరకు 8 కిలోమీటర్లు, అనంతరం చౌరస్తా నుంచి చండి గ్రామం వరకు10 కిలోమీటర్ల మేర రోడ్డు అధ్వాన్నంగా మారింది. ఏండ్ల తరబడి అభివృద్ధికి నోచుకోకపోవడం, కనీసం మెయింటెన్స్ అయినా సరిగా చేయకపోవడంతో రాకపోకలకు తీవ్ర ఇబ్బందులు ఎదురవుతున్నాయి. రోడ్డు పూర్తిగా కంకర తేలి, గుంతలు పడడంతోపాటు, వర్షాలు కురిసినపుడు బురదమయంగా మారుతోంది. ఈ కారణంగా వాహనదారులు ప్రమాదాల బారిన పడుతున్నారు. రెండేళ్ల కింద 18 కిలోమీటర్ల దూరం రోడ్డు అభివృద్ధికి రూ.38 కోట్లు మంజూరయ్యాయి. అర్అండ్ బీ అధికారులు పలుమార్లు టెండర్లు పిలిచినా కాంట్రాక్టర్లు ముందుకు రాలేదు. ఎట్టకేలకు గతేడాది టెండర్ ఖరారు కాగా కాంట్రాక్టర్ పనులు మొదలుపెట్టారు.
ప్రమాద సూచికలు లేక..
ఉసిరికపల్లి రూట్లో పోతుల బోగుడ వరకు రోడ్డు విస్తరణ పనులు కొనసాగుతున్నాయి. పలుచోట్ల కల్వర్టులు నిర్మించారు. ఉసిరికపల్లి శివారులో వాగు ఉన్న చోట బ్రిడ్జి నిర్మించాల్సి ఉంది. ఉసిరికపల్లి చౌరస్తా నుంచి గ్రామం వైపు వెళ్లే రూట్లో రోడ్డు విస్తరణ పని జరుగగా వాగు ఉన్న చోట రోడ్డు ఇరుకుగా మారింది. అక్కడ వాహనదారులను అలర్ట్ చేసేలా సూచిక బోర్డులు ఏర్పాటు చేయాల్సి ఉన్నా అలాంటివి ఏమీ పెట్టలేదు. దీంతో ఉసిరికపల్లి చౌరస్తా నుంచి స్పీడ్గా వస్తున్న వెహికల్స్ వాగు దగ్గరకు రాగానే రోడ్డు ఇరుకుగా ఉండడంతో ఇబ్బంది పడుతున్నారు.
బుధవారం కారు వాగులో బోల్తా పడడానికి ఇది కూడా కారణమన్న అభిప్రాయాలు వ్యక్తమవుతున్నాయి. అంతేగాక బ్రిడ్జికి సైడ్వాల్ లేకపోవడంతో కారు నేరుగా వాగులోకి దూసుకెళ్లి నీట మునిగింది. సైడ్వాల్ ఉన్నట్టయితే కారు దానిని ఢీకొనేది అప్పుడు ప్రమాద తీవ్రత ఈ స్థాయిలో ఉండేది కాదని స్థానికులంటున్నారు. బుధవారం కారు బోల్తా పడి ఏడుగురు మృతి చెందగా, గురువారం ఆర్అండ్బీ అధికారులు అక్కడ సూచిక బోర్డు ఏర్పాటు చేశారు. ఇప్పటికైనా సంబంధిత అధికారులు స్పందించి రోడ్డు విస్తరణ పనులు త్వరగా పూర్తి చేసేలా చర్యలు తీసుకోవాలని, అవసరం ఉన్న చోట బ్రిడ్జిల నిర్మాణం చేపట్టాలని ఆయా గ్రామాల ప్రజలు కోరుతున్నారు.
