వరంగల్ సిటీ, వెలుగు: భార్య కాపురానికి రావడం లేదని ఓ యువకుడు సోమవారం రాత్రి సెల్ఫీ తీసుకుని ఉరేసుకున్నాడు. వరంగల్ బీఆర్ కాలనీలోని రాజీవ్ గృహకల్పలో నివాసముండే దొనికెల సతీశ్(30), రాధిక భార్యాభర్తలు. వీరికి ఇద్దరు పిల్లలు ఉన్నారు. మనస్పర్థలు రావడంతో సతీశ్ దంపతులు రెండున్నర సంవత్సరాలుగా వేర్వేరుగా ఉంటున్నారు. ఎన్నోమార్లు పెద్దమనుషుల ద్వారా రాజీ కుదిర్చిన ఫలితం లేకుండా పోయింది.
దీంతో మనస్తాపం చెందిన సతీశ్ ఇంట్లో ఉరేసుకున్నాడు. ఆటో డ్రైవర్ గా పనిచేసే సతీశ్ తన ఆత్మహత్య కు ముందు సెల్ఫీ వీడియో తీసుకున్నాడు. తన చావుకు భార్య రాధిక, అత్తతో పాటు బామ్మర్ది కారణంగా చెప్పాడు. మృతుడి బంధువులు ఇచ్చిన ఫిర్యాదుతో పోలీసులు కేసు నమోదు చేసుకున్నారు.
