- జాగా కనిపిస్తే చాలు టీఆర్ఎస్ లీడర్లు కబ్జా చేస్తున్నరు : సంజయ్
- ప్రగతిభవన్ స్క్రిప్ట్నే వరంగల్ సభలో రాహుల్ చదివిండు
- మేం ఎక్కడ పోరాటాలు చేసినా డైవర్ట్ చేసేందుకు కాంగ్రెస్ ప్రయత్నిస్తున్నది
- ఇదంతా టీఆర్ఎస్, కాంగ్రెస్ పొత్తులో భాగమేనని ఆరోపణ
మహబూబ్నగర్, వెలుగు : ‘‘టీఆర్ఎస్ లీడర్లు ఇంటర్నేషనల్ దొంగలు. జాగా కనిపిస్తే చాలు కబ్జా చేస్తున్నరు. కేసీఆర్ కేబినెట్లో కొత్తగా వెంచర్ల శాఖను తీసుకొస్తరేమో” అని బీజేపీ స్టేట్ చీఫ్ బండి సంజయ్ మండిపడ్డారు. ప్రజా సంగ్రామ యాత్ర–2 శనివారం రాత్రి మహబూబ్నగర్ జిల్లా జడ్చర్ల పట్టణానికి చేరుకుంది. ఈ సందర్భంగా స్థానిక సిగ్నల్ గడ్డ వద్ద ఏర్పాటు చేసిన సభలో సంజయ్ మాట్లాడారు. జడ్చర్ల నియోజకవర్గంలో రైతులు రోడ్డున పడ్డారని ఆవేదన వ్యక్తం చేశారు. ఇక్కడి ఎస్సీ, ఎస్టీల భూములను లాక్కునే ప్రయత్నం చేస్తున్నారని అన్నారు. ఏండ్లుగా సాగు చేసుకుంటున్న భూములను ‘ధరణి’లో అసైన్డ్ భూములుగా చూపించి, వాటిని లాక్కునే ప్రయత్నం చేస్తున్నారని ఆగ్రహం వ్యక్తం చేశారు. ఇప్పటికే కొందరి భూములను లాక్కొని రియల్ ఎస్టేట్ వెంచర్లు, ఫ్యాక్టరీలు, టీఆర్ఎస్ పార్టీ కార్యాలయాలు కడుతున్నారని ఆరోపించారు. భూములను లాక్కుంటే ఎక్కడికి పోయి బతుకుతారని ఆయన ప్రశ్నించారు. జడ్చర్లలో ఇప్పటి వరకు డబుల్ బెడ్రూం ఇండ్లను ఎందుకు ఇవ్వలేదో స్థానిక ఎమ్మెల్యేను ప్రజలు ప్రశ్నించాలని ఆయన పిలుపునిచ్చారు. ‘‘ఇక్కడి నాయకులు కేసీఆర్ గడీల వద్ద కాపలా కాస్తున్నరు. అధికారం అడ్డుపెట్టుకొని భూ దందాలు, ఇసుక దందాలు చేస్తూ గుంటనక్కల్లా సంపాదించుకుంటున్నరు. ఆఖరికి దేవాలయాల భూములను కూడా ఆక్రమించి అమ్ముకున్నరు” అని ఆరోపించారు. కేసీఆర్ పాలనలో చివరికి కుల వృత్తుల వాళ్లు కూడా బతకలేకపోతున్నారని సంజయ్ అన్నారు. ‘‘రాష్ట్రంలోకి టూరిస్టులు వచ్చారని కేటీఆర్ అంటున్నడు. బీజేపీ లీడర్లు టూరిస్టులు కాదు. మా సత్తా ఏందో ముందు ముందు తెలుస్తది. ముందు ఉమ్మడి పాలమూరుకు మీరేం చేశారో సమాధానం చెప్పండి. దేశమంతా కేసీఆర్ ఇజ్జత్ లేని మనిషి అని అంటున్నరు. ఢిల్లీలో గంట కూడా దీక్ష చేయలేకపోయిండని విమర్శిస్తున్నరు. ఆయనది మొత్తం నటనే అని అందరికీ తెలిసిపోయింది” అని అన్నారు.
కృష్ణమ్మను ఏపీకి తాకట్టు పెట్టిన్రు : డీకే అరుణ
కృష్ణమ్మను ఏపీకి కేసీఆర్తాకట్టు పెట్టారని బీజేపీ జాతీయ ఉపాధ్యక్షురాలు డీకే అరుణ అన్నారు. ‘‘ఏపీ ప్రభుత్వం కృష్ణానదిపై ప్రాజెక్టులు పూర్తి చేస్తుంటే, మీరెందుకు పూర్తి చేయడం లేదో ప్రజలకు సమాధానం చెప్పాలి” అని కేసీఆర్ను డిమాండ్ చేశారు. పాలమూరు–రంగారెడ్డి స్కీం కింద రైతుల నుంచి భూములు తీసుకొని ప్రాజెక్టులను పూర్తి చేయలేదని బీజేపీ జాతీయ కార్యవర్గ సభ్యుడు జితేందర్రెడ్డి మండిపడ్డారు.
కేసీఆర్, రాహుల్ కొత్త నాటకాలు
రాహుల్ గాంధీ తెలంగాణకు ఎందుకు వచ్చాడో సమాధానం చెప్పాలని బండి సంజయ్ డిమాండ్ చేశాడు. బీజేపీ రైతు దీక్ష చేపడితే, కాంగ్రెస్ ఎక్కడో మరో దీక్ష చేస్తదని, తాము ఎక్కడ పోరాటాలు చేసినా దాన్ని డైవర్ట్ చేసే ప్రయత్నం చేస్తుందని మండిపడ్డారు. ఇదంతా టీఆర్ఎస్, కాంగ్రెస్ పొత్తులో భాగమేనని ఆరోపించారు. బీజేపీకి అనుకూలంగా ఇంటెలిజెన్స్, గ్రౌండ్ రిపోర్ట్ రావడంతో కేసీఆర్, రాహుల్ గాంధీ కలిసి కొత్త నాటకాలు మొదలు పెట్టారని, ఇదంతా కేసీఆర్ ప్లాన్ అని అన్నారు. వరంగల్లో జరిగిన కాంగ్రెస్ సభకు ప్రగతి భవన్ నుంచే స్క్రిప్ట్ పోయిందని, దాన్నే రాహుల్ చదివారని విమర్శించారు. కాంగ్రెస్కు దేశంలో ఎక్కడ ప్రజాదరణ లేదని, ఇటీవల జరిగిన ఎన్నికల్లోనే ఆ విషయం బయట పడిందన్నారు.
