గచ్చిబౌలి, వెలుగు: తప్పుడు పే స్లిప్లు సృష్టించి పలువురు వ్యక్తుల పేరు మీద బ్యాంకు నుంచి రూ. 20 కోట్ల మేర పర్సనల్ లోన్ తీసుకొని చీటింగ్ చేసిన ఇద్దరు ప్రధాన నిందితులతో పాటు మరో 8 మంది నిందితుల గ్యాంగ్ను సైబరాబాద్ సైబర్ క్రైమ్ పోలీసులు అరెస్ట్ చేశారు. ఈ గ్యాంగ్ 72 మంది అమాయక జనాలపై రూ.20 కోట్ల వరకు బ్యాంక్ లోన్ తీసుకున్నట్లు సైబర్ క్రైమ్ పోలీసులు గుర్తించారు. పోలీసులు తెలిపిన వివరాల ప్రకారం.. కేపీహెచ్బీకాలనీ లోధాలో ఉండే పాలురి దీపక్రెడ్డి(35) ఎడ్యుకేషన్ కన్సల్టెన్సీ బిజినేస్ రన్ చేస్తున్నాడు. ఇతను జీఎస్ఆర్ ఎడ్వైజర్ ప్రై. లిమిటెడ్ అనే కంపెనీకి ఎండీగా పనిచేస్తున్నాడు. మోతినగర్కు చెందిన రాజ్కుమార్(33) రియల్ ఎస్టేట్ బిజినెస్ చేస్తున్నాడు. వీరిద్దరు కలిసి గ్యాంగ్గా ఏర్పడ్డారు. దీపక్రెడ్డి తన వద్ద పనిచేస్తున్న 31 మందిని క్యాప్స్టన్ సర్వీస్ లిమిటెడ్ కంపెనీలో పనిచేసేందుకు ఒప్పదం చేసుకున్నాడు. 31 మంది క్యాప్స్టన్లో ఒక నెల జాబ్ చేసేందుకు వారి ఆధార్, పాన్ కార్డు, బ్యాంక్ వివరాలను, జాబ్ రోల్ను క్యాప్ స్టన్కు అందించాడు. వీరంందరూ జీఎస్ఆర్ కంపెనీ నుండి క్యాప్స్టన్లో జాబ్ చేస్తున్నారు. అయితే నెల రోజుల తర్వాత 31 మంది హాజరును క్యాప్స్టన్కు అందించకపోవడంతో వీరి ఉద్యోగాలను రద్దు చేసింది.
అయితే జీతాలు పడే బ్యాంక్ ఖాతాలు ఉన్న బ్యాంకులకు ఈ వివరాలను క్యాప్స్టన్ చెప్పలేదు. ఈ 31 మందికి నెల రోజులకు సంబంధించిన జీతాలను క్యాప్స్టన్ కంపెనీ పేరు మీద పే స్లిప్లు సదరు వ్యక్తులకు అందజేసింది. నెల ప్రాజెక్టు కోసం నియమించుకోవడంతో క్యాప్స్టన్ కూడా పెద్దగా పట్టించుకోలేదు. అదే విధంగా రాజ్కుమార్ స్కాట్లైన్ కంపెనీ సీఈవో అయిన స్వరూప్కు ఫ్యామిలీ ఫ్రెండ్. స్వరూప్కు స్కిల్మేజ్ సీఈవో, బోద్ ట్రీ సీఈవోలతో పరిచయముంది. స్కాట్లైన్ కంపెనీ, బోద్ట్రీ కంపెనీల మధ్య కాంట్రాక్ట్ పద్దతిన కార్మికులను నియమించుకునే ఒప్పందం ఉంది. ఈ క్రమంలో రాజ్కుమార్ 28 మందిని స్వరూప్కు రిఫర్ చేశాడు. వారి ఆధార్, పాన్ కార్డులు, బ్యాంకు వివరాలను స్వరూప్కు అందజేశాడు. 23 మంది స్కిల్ మేజ్(యూఎస్ కంపెనీలో), ఐదుగురు బోద్ట్రీ కంపెనీలలో పనిచేస్తున్నట్లు పే స్లిప్లు రూపొందించమని స్కాట్లైన్ హైదరాబాద్ బ్రాంచ్ను స్వరూప్ ఆదేశించాడు. దీంతో బోద్ట్రీ 5 మంది పే స్లిప్లు, స్కాట్లైన్ కంపెనీ 23 మంది పే స్లిప్లు ప్రిపేర్ చేసింది. దీపక్ రెడ్డి, రాజ్కుమార్ ఇద్దరు రాకేశ్ రెడ్డి, దినేశ్ రెడ్డి, సాయి రవి వర్మ, ఈ. సురేష్, డి. సురేష్, చిట్టిబాబు, హరీష్ చంద్రగోపాల్, ఆదినారాయణ, వెంకటేశ్తో కలిసి హెచ్డీఎఫ్సీ బ్యాంక్ ఆన్లైన్ ఫ్లాట్ఫాం ద్వారా పర్సనల్ లోన్లకు అప్లై చేశారు. ఈ కేవైసీ ద్వారా సంబంధిత పత్రాలను అప్లోడ్ చేశారు. బ్యాంక్ బ్యాలెన్స్, జీతం క్రెడిట్ను చూపెట్టేందుకు కంపెనీ నుంచి తీసుకున్న బ్యాంక్ స్టేట్మెంట్లు, పే స్లిప్లు కూడా అప్లోడ్ చేశారు. లోన్కు అప్లై చేసుకున్న వారందరూ బోద్ట్రీ కన్సల్టింగ్, క్యాప్స్టన్ సర్వీసెస్, అడెక్కో ఇండియా లిమిటెడ్ కంపెనీల్లో జాబ్ చేస్తున్నట్లు అప్లికేషన్లో చూపెట్టారు.
ఒక్కోక్కరిపై 50 లక్షల పర్సనల్ లోన్ తీసుకుండ్రు..
దీపక్ రెడ్డి, రాజ్కుమార్ మరో 8 మందితో కలిసి బ్యాంకు అధికారులను మేనేజ్ చేసి ఒక్కో వ్యక్తి పేరు మీద రూ.50 లక్షల వరకు పర్సనల్ లోన్ తీసుకున్నారు. బ్యాంక్ నుంచి కన్ఫర్మేషన్ కాల్ మాట్లాడేందుకు అప్లయ్ చేసిన వారి ఫోన్లను తమ వద్దే పెట్టుకున్నారు. ఒక్కో వ్యక్తిపై రూ. 40 లక్షల నుండి 50 లక్షల వరకు పర్సనల్ లోన్లు వచ్చిన తర్వాత బాధితులకు 2 నుండి 3 లక్షలు ఇచ్చారు.
ALSOREAD:కొందరు నేతల చేరికలపై భిన్నాభిప్రాయాలు మాత్రమే ఉన్నయ్..కాంగ్రెస్ నేత మల్లు రవి
దొరికిండ్రు ఇలా...
లోన్ తీసుకున్న తర్వాత తిరిగి నెల నెల బ్యాంక్కు తిరిగి చెల్లించడంలో లోన్ తీసుకున్న వారు విఫలం కావడంతో బ్యాంకు అధికారులు వెరిఫికేషన్ మొదలుపెట్టారు. పర్సనల్ లోన్ అప్లై చేసే టైంలో అప్లికెంట్లు ఇచ్చిన అడ్రస్లో ఎవరు లేరు. దీంతో బ్యాంక్ అధికారులు మొత్తం రూ. 4 కోట్ల 38 లక్షల 17 వేల వరకు పర్సనల్ లోన్లు తీసుకొని చీటింగ్ చేసినట్లు సైబరాబాద్ సైబర్ క్రైమ్ పోలీసులకు కంప్లయింట్ చేశారు. ఈ మేరకు పోలీసులు కేసు నమోదు చేసుకొని దర్యాప్తు చేపట్టారు. 10 మంది గ్యాంగ్ సభ్యుల ముఠాను అరెస్ట్ చేశారు. ఈ గ్యాంగ్ ఇప్పటి వరకు 72 మంది పేరు మీద 20 కోట్ల వరకు పర్సనల్ లోన్ తీసుకున్నట్లు పోలీసులు గుర్తించారు. వీరు బ్యాంక్ అధికారులను మ్యానేజ్ చేసి ఫ్రాడ్ చేసినట్లు గుర్తించారు. ఈ గ్యాంగ్కు సపోర్ట్ చేసిన వీరిలో హెచ్డీఎఫ్సీ బ్యాంక్ పర్సనల్ లోన్ అధికారులు చిట్టిబాబు, డి. సురేష్, హరీష్ చంద్ర గోపాల్లు ఉన్నారు. వీరందరిని అరెస్ట్ చేసి రిమాండ్కు తరలించినట్లు సైబర్ క్రైమ్ పోలీసులు తెలిపారు.
