పాలమూరు రోడ్లకు మహర్దశ

బాలానగర్​ నుంచి కొత్తగా  రెండు బైపాస్ రోడ్లు
ఒకటి కల్వకుర్తి వరకు.. మరొకటి పాలమూరుకు
డీపీఆర్ సిద్ధం చేస్తున్న  ఆర్అండ్​బీ ఆఫీసర్లు
తెలంగాణ, రాయలసీమలో 12 లేన్లకు విస్తరించనున్న  ఎన్​హెచ్ 44

మహబూబ్​నగర్​, వెలుగు : పాలమూరు రోడ్లకు మహర్దశ రానుంది. మండల కేంద్రాలు, గ్రామీణ ప్రాంత రోడ్లను సింగిల్ నుంచి డబుల్​రోడ్లుగా డెవలప్​చేసేందుకు రాష్ట్ర సర్కారు నిధులు కేటాయించింది. కొద్ది రోజుల కిందట వీటి పనులు ప్రారంభం కాగా, త్వరలో నేషనల్​ హైవే- 44 నాలుగు లేన్ల నుంచి 12 లేన్లకు విస్తరించనుంది. ఇందులో భాగంగా మహబూబ్​నగర్​, కల్వకుర్తి ప్రాంతాలకు ఎన్​హెచ్​-44 నుంచి లింక్​ కలిపేలా బైపాస్​ రోడ్ల నిర్మాణాలకు ప్రభుత్వం ప్రపోజల్స్ రెడీ చేస్తోంది. 

ట్రాఫిక్​ సమస్యకు చెక్

ఎన్ హెచ్​-44పై బాలానగర్ ​మండల కేంద్రం నుంచి రెండు బైపాస్​ రోడ్లను నిర్మించేందుకు ప్రభుత్వం కసరత్తు చేస్తోంది. అందులో ఒకటి మాచారం క్రాస్​ రోడ్డు నుంచి ఉడిత్యాల, నవాబుపేట మీదుగా మహబూబ్​నగర్​కు లింక్ కలిపేలా యోచిస్తోంది. దాదాపు 30 కిలోమీటర్ల మేర ఈ బైపాస్​ రోడ్డును నిర్మించనుంది. మరో బైపాస్​ను గౌతాపూర్, పెద్ద రేవల్లి, తొమ్మిదిరేకుల , మిడ్జిల్​, కల్వకుర్తి వరకు.. లేదా మైసిగండి నుంచి కడ్తాల్​ మీదుగా కల్వకుర్తి లింక్​ కలిపేలా ఆలోచన చేస్తోంది. దీనికి సంబంధించిన ఆర్అండ్​బీ శాఖ డీపీఆర్​సిద్ధం అవుతోంది. ఈ రెండు బైపాస్​లు ఏర్పాటు చేయడం వల్ల జడ్చర్ల టౌన్​లో ట్రాఫిక్​ సమస్యకు చెక్​పడనుంది. ఇప్పటికే జడ్చర్ల టౌన్​లో అటు కల్వకుర్తికి వెళ్లే రోడ్డు, ఇటు మహబూబ్​నగర్​ నుంచి జడ్చర్లకు రావడానికి ఫ్లై ఓవర్​ వద్ద ట్రాఫిక్​ సమస్య తీవ్రంగా ఉంది. బాలానగర్​ వద్ద బైపాస్​లను ఏర్పాటు చేయడం వల్ల ఈ సమస్య తీరనుంది.

12 లేన్లుగా ఎన్​హెచ్​-44

ఉమ్మడి పాలమూరు జిల్లాలోని మహబూబ్​నగర్, వనపర్తి, జోగులాంబ గద్వాల జిల్లాల్లో ఎన్​హెచ్​-44  విస్తరించి ఉంది. హైదరాబాద్​ నుంచి బెంగళూరు వరకు మొత్తం 576 కి.మీ. మేర ఈ రహదారి ఉండగా.. బూర్గుల గేట్​ నుంచి పుల్లూరు వరకు 149 కి.మీ. ఉంది. ఉమ్మడి బాలానగర్​, జడ్చర్ల, భూత్పూర్​, ఉమ్మడి అడ్డాకుల, కొత్తకోట, పెబ్బేరు, ఇటిక్యాల, మానవపాడు, ఉమ్మడి అలంపూర్​ మీదుగా ఈ రోడ్డు సాగుతోంది. అయితే ఈ రోడ్డును గతంలో నేషనల్​ హైవే అథారిటీ ఆఫ్​ ఇండియా (ఎన్​హెచ్​ఏఐ) ఆరు లేన్లుగా విస్తరించేందుకు నిర్ణయించింది. 

ఇప్పుడు తెలంగాణ, ఏపీలోని రాయలసీమ ప్రాంతాల మీదుగా బెంగళూరు వరకు 12 లేన్లు చేయాలని కసరత్తు చేస్తున్నట్లు తెలిసింది. ఇటీవల కేంద్ర బడ్జెట్​లోనూ హైదరాబాద్​– బెంగళూరు కారిడార్​కు సంబంధించి ఉమ్మడి జిల్లాకు సమీపంలోని కర్నూల్​ జిల్లా ఓర్వకల్లుకు నిధులు మంజూరు చేశారు. తద్వారా పరిశ్రమల స్థాపనకు అనువుగా ఉంటుందని ప్లాన్​ చేస్తున్నట్లు సమాచారం. అలాగే ఈ హైవే పొంటి ఉన్న బ్లాక్ స్పాట్స్​వద్ద అండర్​పాస్​లు, సర్వీస్​రోడ్లు, అవసరం ఉన్న చోట్ల ఫ్లై ఓవర్​లను నిర్మిచేందుకు ప్రతిపాదనలు సిద్ధం చేయాలనే ఆలోచన చేస్తున్నట్లు తెలిసింది. 

రూ.350 కోట్లతో రోడ్ల అభివృద్ధి

మహబూబ్​నగర్, నారాయణపేట, వికారాబాద్​ జిల్లాల్లోని గ్రామాల మధ్య కనెక్టివిటీ పెంచేందుకు రాష్ట్ర సర్కారు ప్రత్యేకంగా నిధులు కేటాయించింది. ఆర్అండ్​బీ, పంచాయతీ రాజ్​ ఆధ్వర్యంలో ఈ మూడు ప్రాంతాల్లో రోడ్ల డెవలప్​మెంట్​ కోసం రూ.350 కోట్లు సాంక్షన్​ చేసింది. ఇందులో కొడంగల్​ నియోజకవర్గంలోని మద్దూరు, కోస్గి, దౌల్తాబాద్, కొడంగల్, బొంరాస్​పేట ప్రాంతాల్లో సింగిల్​రోడ్లను డబుల్​ రోడ్లుగా మార్చేందుకు, ఐదు చోట్ల బ్రిడ్జిలు నిర్మాణానికి, రెండు ప్రాంతాల్లో గుంతలు పడిన రోడ్లకు రిపేర్లు చేయడానికి రూ.215 కోట్లు కేటాయించింది. జడ్చర్ల నియోజకవర్గంలోని బాలానగర్, రాజాపూర్, నవాబ్​పేట, మిడ్జిల్​ ప్రాంతాల్లో సింగిల్​ రోడ్లను డబుల్​ రోడ్లుగా మార్చేందుకు రూ.133 కోట్లు విడుదల చేసింది. ఇటీవల కొడంగల్​ నియోజకవర్గంలో ఈ పనులు ప్రారంభం కాగా.. జడ్చర్ల నియోజకవర్గంలో టెండర్ల ప్రక్రియ పూర్తి కావడంతో పనులకు కొబ్బరికాయ కొట్టారు.

టెండర్లు పూర్తయ్యాకే కొబ్బరికాయ కొడ్తున్నం

గత ప్రభుత్వం డెవలప్​మెంట్​ వర్క్స్​కు టెండర్లు పిలవకుండానే శంకుస్థాపనలు చేసి కొబ్బరికాయలు కొట్టేది. ఆ తర్వాత పనులన్నీ పెండింగ్​లోనే పెట్టేది. మా ప్రభుత్వం మాత్రం టెండర్లు పూర్తై, పనులు కాంట్రాక్టర్లకు అప్పగించాకే కొబ్బరికాయలు కొడుతున్నాం. బాలానగర్ మండలం నుంచి రెండు బైపాస్​లు నిర్మించడానికి నిర్ణయించాం. ఆఫీసర్లు డీపీఆర్​ కూడా సిద్ధం చేస్తున్నారు. అన్ని పూర్తయితే  జడ్చర్లతోపాటు బాలానగర్ నుంచి పాలమూరు, కల్వకుర్తికి ట్రాఫిక్​ సమస్య లేకుండా ఈజీగా వెళ్లే రోడ్డు మార్గాన్ని ఏర్పాటు చేస్తాం. 

జనంపల్లి అనిరుధ్​ రెడ్డి, ఎమ్మెల్యే, జడ్చర్ల