- నగలు, నగదు చోరీ
సికింద్రాబాద్, వెలుగు: రైలులో ఓ మహిళ దారుణ హత్యకు గురైంది. దివ్యాంగుల బోగీలో మహిళ మెడకు తువాలు బిగించి హత్య చేశారు. రైల్వే పోలీసులు తెలిపిన వివరాల ప్రకారం.. బళ్లారికి చెందిన వెంకటరమణమ్మ(45) హైదరాబాద్లోని జగద్గిరిగుట్టలో ఉన్న తన పెద్ద కూతురు వద్దకు వచ్చేందుకు ఆదివారం బెల్గాం–మణుగూరు ఎక్స్ప్రెస్లోని మహిళా బోగిలో ఎక్కింది.
సోమవారం రాత్రి సికింద్రాబాద్కు రైలు చేరుకోగా, ఆమెను రిసీవ్ చేసుకునేందుకు అల్లుడు వెళ్లాడు. ఆమె కనిపించకపోవడంతో రైలు గార్డు వద్దకు వెళ్లి విషయం చెప్పాడు. మహిళా బోగీ పక్కనే ఉన్న దివ్యాంగుల బోగీలో వెతకగా, రమణమ్మ మెడకు టవల్తో బిగించి హత్య చేసినట్లు గుర్తించారు. వెంటనే రైల్వే పోలీసులకు సమాచారం అందించారు. ఆమె మెడలోని బంగారు గొలుసు, కాళ్ల వెండి పట్టీలు, ఆమె పర్సులో ఉన్న రూ.25వేలు కనిపించలేదు. మహిళా బోగీలో ఎక్కిన రమణమ్మ దివ్యాంగుల బోగీలోకి ఎందుకు మారింది. ఎవరైనా ఆమెను ప్రలోభ పెట్టి బోగీలోకి మార్చి హత్య చేసి నగలు, నగదు దోచుకున్నారా? అనే కోణంలో రైల్వే పోలీసులు దర్యాప్తు చేస్తున్నారు.
