గజ్వేల్(వర్గల్), వెలుగు: దైవ దర్శనానికి వచ్చి అస్వస్థతకు గురైన తల్లిని అసహనంతో తలను నేలకు బాది చంపాడో కొడుకు. తర్వాత ఆమెది సహజ మరణంగా చిత్రించే ప్రయత్నం చేసి దొరికిపోయాడు. ఈ ఘటన సిద్దిపేట జిల్లా వర్గల్మండలం నాచారంగుట్ట క్షేత్రంలో గురువారం తెల్లవారుజామున జరిగింది. గౌరారం ఎస్సై శివకుమార్ కథనం ప్రకారం..హైదరాబాద్ కుత్భుల్లాపూర్ ఇందిరానగర్లో ఉండే గాలిగామ బాలకృష్ణమ్మ(54) ఖైరతాబాద్లోని డైరక్టరేట్ఆఫ్ఎకనామిక్స్ప్లానింగ్డిపార్ట్మెంట్ లో అటెండర్.
బుధవారం ఆమె కొడుకు సర్వేశ్తో పాటు పక్కింటి వారితో కలిసి ఆటోలో నాచగిరి క్షేత్రానికి వచ్చింది. దర్శనం తర్వాత రాత్రి అందరూ కలిసి ఓ సత్రంలో బస చేశారు. రాత్రివేళ బాలకృష్ణమ్మ వాంతులు చేసుకుని అస్వస్థతకు గురైంది. దీంతో కొడుకు అసహనంతో తల్లి తలను నేలకేసి బాదడంతో అక్కడికక్కడే చనిపోయింది. ఇది చూసిన పక్కింటి వారు అక్కడి నుంచి వెళ్లిపోయారు.
తర్వాత సర్వేశ్తన తల్లి అస్వస్థతకు గురై చనిపోయిందని పోలీసులకు ఫిర్యాదు చేశాడు. మృతురాలి బిడ్డ సుజాత సంఘటనా స్థలానికి వచ్చి అనుమానంతో పక్కింటి వారికి ఫోన్ చేసి అడగ్గా వారు అసలు విషయం చెప్పారు. దీంతో ఆమె తన అన్నపై పోలీసులకు ఫిర్యాదు చేసింది. పోలీసులు కేసు నమోదు చేసి దర్యాప్తు చేస్తున్నారు.
