యాదాద్రి, వెలుగు : డబుల్ బెడ్రూం ఇండ్ల పంపిణీలో కలెక్టర్ న్యాయం చేయడం లేదని ఆలేరు టౌన్కు చెందిన పలువురు మహిళలు ఆరోపించారు. ఇండ్లు ఇప్పించాలని భువనగిరిలోని యాదాద్రి కలెక్టరేట్ఎదుట సోమవారం పెట్రోల్ బాటిళ్లతో నిరసన తెలిపారు. ఆలేరు మున్సిపాలిటీలో ఇటీవల 64 డబుల్బెడ్రూం ఇండ్ల పంపిణీ జరిగింది. ఇందులో అర్హులైన తమకు అన్యాయం చేసి, బీఆర్ఎస్ లీడర్లు ఇండ్లు తీసుకున్నారని ఆరోపిస్తూ కౌన్సిలర్ శమంతకరెడ్డితో కలిసి పలువురు మహిళలు కొద్ది రోజులుగా ఆందోళన చేస్తున్నారు.
ఇందులో భాగంగా సోమవారం కలెక్టరేట్వద్ద ఉన్న ధర్నా చౌక్కు పెట్రోల్ బాటిళ్లతో వచ్చి కూర్చున్నారు. ఇండ్లు ఇప్పించాలని కలెక్టర్ను ఎన్నిసార్లు కోరినా పట్టించుకోలేదని ఆరోపించారు. పెట్రోల్ బాటిళ్లతోనే కలెక్టరేట్లోకి వెళ్లేందుకు యత్నించగా పోలీసులు అడ్డుకున్నారు. దీంతో మెట్లపైనే బైఠాయించారు. తర్వాత వారిని బయటకు పంపించేశారు. తమకు న్యాయం జరిగేంతవరకు పోరాడతామని మహిళలు స్పష్టం చేశారు.
