- జడ్పీ మీటింగ్లో మహిళా ప్రతినిధుల నిలదీత
నిజామాబాద్, వెలుగు: నిజామాబాద్ జడ్పీ మీటింగ్ శుక్రవారం దాదన్నగారి విఠల్ రావు అధ్యక్షతన జరగ్గా.. సభ్యులు జిల్లాలో జరుగుతున్న ఘటనలపై తీవ్ర స్థాయిలో అసహనం వ్యక్తం చేశారు. నగరంలోని అయ్యప్ప స్కానింగ్ సెంటర్ లో మహిళల న్యూడ్ ఫొటోలు, వీడియోలు తీసిన ఉదంతంపై ఆఫీసర్లు సైలెంట్గా ఉండడం ఏమిటని మహిళా ప్రజాప్రతినిధులు ప్రశ్నించారు. ఎక్కడా బయటకు చెప్పుకోలేని రీతిలో మహిళలను అవమానపర్చిన ఘటనను సీరియస్గా తీసుకోకపోవడానికి కారణమేందని ఇందల్వాయి జడ్పీటీసీ గడ్డం సుమనారెడ్డి డీఎంహెచ్వో తుకారాం రాథోడ్ను నిలదీశారు.
స్కానింగ్ సెంటర్ తీరు మహిళలను అభద్రతలో పడేసిందని వైస్ ఛైర్పర్సన్ రజితాయాదవ్వాపోయారు. పోలీస్ శాఖ స్కానింగ్ సెంటర్పై పూర్తి విచారణ చేసి కలెక్టర్ రాజీవ్గాంధీ హనుమంతుకు నివేదించిందన్నారు. పై అధికారుల ఆదేశాల ప్రకారం నడుచుకుంటామని డీఎంహెచ్వో రాథోడ్ సమాధానం చెప్పారు. ఆర్మూర్ ఎమ్మెల్యే పైడి రాకేశ్రెడ్డి ఈ అంశంపై చర్చను కొనసాగిస్తూ ఆఫీసర్ల ఇండ్లలో ఇలాంటి ఘటనలు జరిగితే ఆ బాధ ఎట్లా ఉంటుందో అర్థమవుతుందన్నారు.
ప్రొటోకాల్ పాటించరా..?
మాజీ ఎమ్మెల్యేలు, పార్టీ లీడర్లు, ఎమ్మెల్యేల తేడా ఆఫీసర్లకు తెలవదా అని ఎమ్మెల్యే పైడి రాకేశ్రెడ్డి ఆగ్రహం వ్యక్తం చేశారు. తాను ప్రాతినిథ్యం వహిస్తున్న ఆర్మూర్ సెగ్మెంట్లో ప్రొటోకాల్ పాటించడం లేదని మండిపడ్డారు. చట్టసభకు ఎన్నికైన తనను అవమానించేలా ఆఫీసర్లు వ్యవహరిస్తే ఊరుకోనన్నారు. గుమ్మిరాల నుంచి హైదరాబాద్ వరకు ఉన్న ఆర్టీసీ బస్ ఫెసిలిటీని ఎందుకు తొలగించారని కమ్మర్పల్లి జడ్పీటీసీ మెంబర్ రాధాగౌడ్ మండలం లోకల్ బాడీ లీడర్లు ప్రశ్నించారు.
బీఆర్ఎస్ పార్టీ మాజీ ఎమ్మెల్యే ఆశన్నగారి జీవన్రెడ్డి నిర్వహణలోని షాపింగ్ మాల్ బకాయిలు రూ.7 కోట్లు ఆర్టీసీకి చెల్లించేలా చేశామని ఎమ్మెల్యే రాకేశ్ రెడ్డి తెలిపారు. బెజ్జోరా ఇసుక రవాణా ఆపాలని, బీఆర్ఎస్ గవర్నమెంట్ హయాంలో నిలిచిపోయిన రోడ్ నిర్మాణాలు పూర్తి చేయాలని, మిషన్ భగీరథను సక్సెస్ఫుల్గా నడుపాలని సభ్యులు సూచించారు.
