- వారి ఓట్ల కోసం అన్ని పార్టీల ప్రయత్నాలు
- మహిళా స్కీములు కలిసి వస్తాయని కాంగ్రెస్ ఆశలు..
మహబూబాబాద్, వెలుగు: ఎంపీ ఎన్నికల్లో అభ్యర్థుల గెలుపు ఓటములను డిసైడ్ చేయడంలో మహిళా ఓటర్లే కీలకంగా మారుతున్నారు. గతంలో కంటే మహిళా ఓటర్ల సంఖ్య ఇప్పుడు పెరిగింది. మహబూబాబాద్, వరంగల్ పార్లమెంట్ పరిధిలో మహిళ ఓట్ల శాతం ఎక్కువగా ఉండటంతో వారిని ప్రసన్నం చేసుకొనే పనిలో అభ్యర్థులు ఉన్నారు. గత అసెంబ్లీ ఎన్నికల్లోను మహిళ ఓటింగ్ శాతమే ఎక్కువగా ఉంది.
ఈ నేపథ్యంలో రాజకీయ పార్టీలన్ని మహిళల ఓట్లు పొందడం ఎలా అనేదానే పైనే ఆలోచన చేస్తున్నారు. మహబూబాబాద్ ఎంపీ నియోజకవర్గం పరిధిలోని ఏడు అసెంబ్లీ నియోజకవర్గాల్లో గత అసెంబ్లీ ఎలక్షన్ సమయంలో 14,68,018 మంది ఓటర్లు ఉండగా ప్రస్తుతం 15, 28,419 మంది ఓటర్లు ఉన్నారు. వీరిలో 745554 పురుషులు, 781339 మంది మహిళా ఓటర్లు, 105 మంది థర్డ్ జెండర్ ఓటర్లు ఉన్నారు. వరంగల్ ఎంపీ పరిధిలో గతంలో 18,08,203 మంది ఓటర్లు ఉండగా, ప్రస్తుతం మొత్తంగా18,16,543 మంది ఓటర్లు ఉన్నారు. వీరిలో పురుష ఓటర్లు 8,92,335, మహిళా ఓటర్లు 9,24,208 మంది ఉన్నారు.
కాంగ్రెస్కు కలసి వస్తుందా?
అసెంబ్లీ ఎన్నికల సమయంలో ఇచ్చిన ప్రధాన హమీలలో మహిళలకు ఆర్టీసీ బస్సుల్లో ఉచిత ప్రయాణం, మహిళా సంఘాలకు వడ్డీలేని రుణాలు, రుణ బీమా పథకం, రూ.10లక్షల వరకు బీమా వంటి స్కీమ్స్, మహలక్ష్మిలో రూ. 500లకే గ్యాస్ సిలిండర్, ఉద్యోగులకు ఒకటో తారీకు జీతాలు, రూ.10లక్షల వరకు ఆరోగ్యశ్రీ వర్తింపు, గృహ జ్యోతిలో 200 యూనిట్ల ఉచిత విద్యుత్, మహిళ పేరిట రూ.5లక్షలతో ఇందిమ్మ గృహలు వంటి పథకాలు ఆకర్షిస్తున్నాయి.
దీంతో మహిళా ఓటర్లు రాష్ట్ర ప్రభుత్వంలో ఉన్న కాంగ్రెస్ వైపు మొగ్గు చూపే అవకాశం ఎక్కువగా ఉంది. ఈ క్రమంలో మహిళా ఓటర్లు ఎక్కువగా ఎవరివై వైపు మొగ్గు చూపితే ఆ పార్టీకే గెలుపు అవకాశాలు ఉండనున్నాయి.
