నాలుగేండ్లవుతున్నా పూర్తికాని మోడల్​ మార్కెట్​

• అంచనా వ్యయం  పెరుగుతున్నా  పనులు మాత్రం అయితలే
• రోడ్ల పైనే వెజ్,​ నాన్​ వెజ్​ అమ్మకాలు
• పట్టించుకోని అధికారులు 

జనగామ, వెలుగు:  జనగామ లో మోడల్​ మార్కెట్​ పనులు నత్తనడకన సాగుతున్నాయి.  పట్టణంలో ఎక్కడ పడితే అక్కడ మాంసం, కూరగాయల అమ్మకాలు బంద్​  చేసేందుకు ఈమోడల్​ మార్కెట్​ను మొదలు పెట్టారు. పైగా సిద్దిపేటలోని మోడల్​ మార్కెట్​ కన్నా అద్భుతంగా దీన్ని కడతామని లీడర్లు చెప్పారు.  ప్లాన్లు, డిజైన్లు మార్చి బడ్జెట్​ను కూడా డబుల్​ చేశారు. కానీ క్షేత్ర స్థాయిలో మాత్రం పట్టింపు కరువైంది. పునాది వేసి నాలుగేండ్లయినా మోడల్​ మార్కెట్​ఇంకా గోడలకే పరిమితమైంది.

నాలుగేండ్ల కిందట పునాది

జనగామ జిల్లా కేంద్రంగా మారడంతో జనాల రద్దీ పెరిపోయింది. టౌన్​ జనాభా సుమారు లక్ష దాటినట్లు అంచనా. ఈ నేపథ్యంలో జిల్లా కేంద్రాన్ని డెవలప్​ చేయాలన్న ఉద్దేశంతో నాలుగేండ్ల క్రితం టౌన్​ లోని దయానిలయం సమీపంలో మోడల్​ మార్కెట్​ నిర్మాణానికి నిధులు మంజూరయ్యారు. టీయూఎఫ్​ఐడీసీ కింద ఈ నిధులు మంజూరు కాగా  ఆర్భాటంగా శంకుస్థాపన చేశారు. పనులు వెంటనే పూర్తి చేస్తామని చెప్పుకొచ్చారు.  కానీ, పనులు నెమ్మదిగా కొనసాగుతున్నాయి. 

అంచనాలు డబుల్​ 

మోడల్​ మార్కెట్​ నిర్మాణానికి తొలుత రూ. 2 కోట్లు   మంజూరు చేశారు. సిద్దిపేట మార్కెట్​ను తలదన్నేలా రూపుదిద్దుకోనున్నట్లు చెప్పారు. కానీ   ఈ నిధులు సరిపోవట్లేదని అదనంగా    రూ. 2కోట్లు మంజూరు చేశారు. ముందు అనుకున్న డిజైన్​  కాకుండా పలుమార్లు  మార్పులు కూడా చేశారు.  దీంతో   కొత్త డిజైన్​కు అంచనాలు కూడా పెరిగాయి.   పలు మార్లు కౌన్సిల్​ మీటింగ్​ లలో  మోడల్​ మార్కెట్​ గురించి ప్రతిపక్షాల లీడర్లు ప్రశ్నించినా.. . పట్టింపు లేకుండా పోయింది.  ఈ మార్కెట్​ లో వెజ్​ 43, నాన్​ వెజ్​ 60 స్టాళ్లు ఏర్పాటు చేస్తామని చెప్పారు. ఈ నెల చివరికల్ల పనులను పూర్తి చేస్తామని అధికారులు చెప్తున్నా.. ఆ పరిస్థితి కనిపించడం లేదు.  ఇదిలా ఉంటే దీని పక్కనే రూ రెండు కోట్లతో ఫ్లవర్​ మార్కెట్​ నిర్మాణానికి నిధులు మంజూరయ్యాయి. వీటి నిర్మాణం పూర్తైతే జనగామకు సరికొత్త కళ రానుండగా పర్యవేక్షణ లోపంతో ఇబ్బందులు తప్పడం లేదు.

రోడ్ల పైనే అమ్మకాలు

మోడల్​ మార్కెట్​ నిర్మాణం లేట్​ అవుతుండటంతో రోడ్ల పైనే కూరగాయలు, మాంసం అ మ్ముతున్నారు.    బస్టాండ్​ ఏరియా, సిరాజ్​ ఫ్రూట్స్​ ఏరియా, రైల్వే స్టేషన్​ పరిసరాలు, సిద్ధిపేట రోడ్డు, ఇలా పలు చోట్ల రోడ్ల పై అమ్మకాలు జరుగుతున్నాయి.   ట్రాఫిక్​ కు కూడా  అంతరాయం కలుగుతోంది. 

నెలాఖరు వరకు పూర్తి చేయిస్తం 

జనగామ మోడల్​ మార్కెట్​ పనులు దాదాపు పూర్తి కావచ్చినయ్​. రూ నాలుగున్నర కోట్లతో పనులు జరుగుతున్నయ్​. వెజ్​, నాన్​ వెజ్​ స్టాళ్ల ఏర్పాటు పనులు చేస్తున్నరు.  ఈ నెలాఖరుకు పూర్తి చేసి ఓపెన్​ చేసేందుకు చర్యలు తీసుకుంటున్నం. పనులు చేపడుతున్న కాంట్రాక్టర్​ కు త్వరగా పూర్తి చేయాలని చెప్పాం. కొద్ది రోజుల్లోనే మార్కెట్​ ను అందుబాటులోకి తీసుకు వస్తం.

- జంపాల రజిత, మున్సిపల్​ కమిషనర్​, జనగామ

పట్టించుకుంటలేరు 

మోడల్​ మార్కెట్​ పనులను స్పీడప్​​ చేయాలని ఎన్ని మార్లు కోరినా పట్టించుకుంట లేరు.  ఏండ్ల తరబడి పనులు చేస్తున్నరు. మొదట్లో రెండు కోట్లన్నరు. ఇప్పుడు డబుల్​ చేసిండ్రట. అయినా పనులు అయితలేవు. మార్కెట్​ పూర్తి అయితే జనగామ జనాలకు సౌకర్యంగా ఉంటుంది. ఇప్పటికైనా పనులు పూర్తి చేసి అందుబాటులోకి తేవాలి.

- జక్కుల అనిత, కౌన్సిలర్, జనగామ