చేవెళ్ల, వెలుగు: రైతుల సంక్షేమానికి నిరంతరం కృషి చేస్తున్నామని అసెంబ్లీ స్పీకర్ గడ్డం ప్రసాద్ కుమార్, మంత్రి తుమ్మల నాగేశ్వరరావు తెలిపారు. రంగారెడ్డి జిల్లాలో శాసనమండలి చీప్ విఫ్ పట్నం మహేందర్రెడ్డి, చేవెళ్ల ఎమ్మెల్యే కాలె యాదయ్యతో కలిసి సోమవారం వారు పర్యటించారు. తొలుత చేవెళ్లలో డీసీఎంఎస్ గోదాం, దుకాణ సముదాయాలను ప్రారంభించారు. అనంతరం షాబాద్ మండలం సర్దార్ నగర్ వ్యవసాయ మార్కెట్ కమిటీ కొత్త చైర్మన్గా పీసరి సురేందర్రెడ్డి, వైస్ చైర్మన్గా జంగయ్య ప్రమాణ స్వీకారోత్సవానికి హాజరయ్యారు.
తిమ్మారెడ్డిగూడ, ఏట్ల ఎర్రవల్లిలో రూ.5 కోట్ల చొప్పున నిర్మించనున్న బ్రిడ్జిల పనులకు శంకుస్థాపన చేశారు. సర్దార్నగర్లో రూ.10 లక్షలతో నిర్మించిన సీసీ రోడ్డు, అంబేద్కర్ విగ్రహాన్ని ప్రారంభించారు. ఈ సందర్భంగా మంత్రి తుమ్మల మాట్లాడుతూ.. మొయినాబాద్ కొత్త మార్కెట్ పాటు కోహెడ దగ్గర మెగా మార్కెట్ను ఏర్పాటు చేసి రంగారెడ్డి జిల్లా రైతాంగానికి భవిష్యత్తులో ఎలాంటి కష్టం లేకుండా చూస్తామన్నారు.
