- రేపటి నుంచి రెండు రోజుల పాటు సెమినార్స్
- 30 దేశాలకు చెందిన వరి ఉత్పత్తుల ప్రదర్శన
- రాష్ట్రం నుంచి ఎగుమతులకు వెసులుబాటు
హైదరాబాద్, వెలుగు: రాష్ట్రంలో ప్రపంచ వరి సదస్సు నిర్వహించేందుకు సన్నాహాలు జరుగుతున్నాయి. ఈ నెల 7 నుంచి రెండు రోజుల పాటు హైదరాబాద్లోని తాజ్ కృష్ణ హోటల్ లో ఈ అంతర్జాతీయ సదస్సును నిర్వహించనున్నారు. అమెరికాకు చెందిన అంతర్జాతీయ కమాడిటీస్ సంస్థ, రాష్ట్ర ప్రభుత్వ సహకారంతో దీనిని చేపడుతున్నారు.
ఈ సదస్సులో అంతర్జాతీయ వరి పరిశోధనా సంస్థ, అంతర్జాతీయ వ్యవసాయ పరిశోధన సంస్థల కన్సార్టియంతో పాటు భారత వరి పరిశోధన సంస్థ, యూపీకి చెందిన చంద్రశేఖర్ ఆజాద్ అగ్రీవర్సిటీ, ఒరిస్సా అగ్రీవర్సిటీ, భారత వరి ఎగుమతిదారుల ఫెడరేషన్ (ఐఆర్ఈఎఫ్), వరి ఎగుమతిదారుల అసోసియేషన్ తదితర సంస్థల ప్రతినిధులతో పాటు దాదాపు 30 దేశాల నుంచి వరి ఉత్పత్తుల ఎక్స్పోర్ట్, ఇంపోర్ట్ దారులు, స్వదేశీ అనుబంధ సంస్థల ప్రతినిధులు, రాష్ట్రం నుంచి అధికారులు, శాస్త్రవేత్తలు, ఆదర్శ రైతులు పాల్గొననున్నారు.
పెరిగిన రైస్ ఎక్స్పోర్ట్స్..
మనదేశంలో బియ్యం ఉత్పత్తి స్వాతంత్ర్యం అనంతరం దాదాపు 8 రెట్లు పెరిగి.. 14 కోట్ల టన్నులకు చేరింది. గత ఐదేండ్లలో దేశంతో పాటు తెలంగాణలో బియ్యం ఉత్పత్తులు గణనీయంగా పెరిగాయి. ప్రపంచంలో బియ్యం అధికంగా వినియోగించే దేశాల్లో ఏటా 155 మిలియన్ టన్నులతో చైనా ఫస్ట్ ప్లేస్లో ఉండగా.. భారత్ 114.5 మిలియన్ టన్నులతో రెండో స్థానంలో ఉంది. బంగ్లాదేశ్ 37.5 మిలియన్ టన్నులు, ఇండోనేషియా 35.6 మిలియన్ టన్నులు, వియత్నాం 21.9 మిలియన్ టన్నులతో ఆ తర్వాతి స్థానాల్లో ఉన్నాయి.
వరి అత్యధికంగా ఇంపోర్ట్ చేసుకొనే దేశాలలో ఫిలిపైన్స్ 3 మిలియన్ టన్నులతో ఫస్ట్ ప్లేస్లో ఉండగా.. చైనా, ఇరాక్, బెనిన్, మొజాంబిక్ తర్వాతి స్థానంలో ఉన్నాయి. 2022–-23 సంవత్సరంలో దాదాపు 191 దేశాలు 420 లక్షల టన్నులు బియ్యాన్ని దిగుమతి చేసుకున్నాయి. ఎగుమతి చేసే దేశాలలో 17.86 మిలియన్ టన్నులతో భారత్ అగ్రస్థానంలో ఉంది. ఆ తరువాత థాయ్లాండ్, వియత్నాం, పాకిస్తాన్, చైనా ఉన్నాయి. తెలంగాణ నుంచి గత నాలుగేండ్లుగా ఎగుమతులు గణనీయంగా పెరిగాయి. ఏటా రూ.15 వేల కోట్లకు పైగా విలువైన బియ్యం ఎక్స్పోర్ట్అవుతున్నట్టు లెక్కలు స్పష్టం చేస్తున్నాయి. ప్రధానంగా రాష్ట్రం నుంచి ఫిలిపైన్స్, అమెరికా, బంగ్లాదేశ్, యునైటెడ్ అరబ్ ఎమిరేట్స్, యూకే, కెనడా దేశాలకు ఎక్కువగా.. సింగపూర్, ఆస్ట్రేలియాకు తక్కువగా ఎక్స్పోర్ట్స్ అవుతున్నాయి.
అందరి చూపు భారత్వైపే..
ప్రస్తుతం ప్రపంచంలో అభివృద్ధి చెందిన యూరప్, అమెరికా, ఆస్ట్రేలియా దేశాలే కాకుండా ఆఫ్రికా, లాటిన్ అమెరికాలోని దేశాలు బియ్యం దిగుమతి కోసం భారత్ వైపు చూస్తున్నాయి. ఈ అవకాశాలను పూర్తిస్థాయిలో వినియోగించుకుంటే రైతాంగానికి సరైన ధరతో పాటు పెద్దమొత్తంలో మార్కెట్ నిల్వల సమస్యను పరిష్కరించుకోవచ్చని ఎక్స్పర్ట్స్అంటున్నారు.
తెలంగాణలో కొత్తగా అధికారంలోకి వచ్చిన కాంగ్రెస్ప్రభుత్వం ఈ సమస్యలకు పరిష్కారం చూపించే దిశలో భాగంగా దేశంలో మొట్టమొదటిసారిగా అంతర్జాతీయ కమాడిటీస్ సంస్థ సహకారంతో ప్రపంచ వరి సదస్సును నిర్వహిస్తున్నది. ఈ సదస్సుతో ఎక్స్పోర్ట్స్, ఇంపోర్ట్స్ చేసే వారికి ఒక వేదిక కల్పించి వ్యాపార అవకాశాలు వృద్ధి చేయనున్నారు. వరి పండించే రైతులందరికీ ఇది దోహదపడుతుందని వ్యవసాయశాఖ మంత్రి తుమ్మల నాగేశ్వర రావు ఆశాభావం వ్యక్తం చేశారు.
