- సీహెచ్సీ సూపరింటెండెంట్, స్పెషలాఫీసర్ సహా 16 మందికి షోకాజ్ నోటీసులు
- సక్రమంగా విధులు నిర్వహించిన డాక్టర్కు అభినందనలు
యాదాద్రి, వెలుగు : డుమ్మాకొట్టిన, డ్యూటీకి ఆలస్యంగా వచ్చిన ఎంప్లాయిస్కు యాదాద్రి కలెక్టర్ ఎం.హనుమంతరావు షాక్ ఇచ్చారు. విధులకు గైర్హాజరు, ఆలస్యంగా వచ్చిన వారికి షోకాజ్ నోటీసులు జారీ చేశారు. నోటీసులు అందుకున్న వారిలో సీహెచ్సీ సూపరింటెండెంట్, స్పెషలాఫీసర్ సహా 16 మంది ఎంప్లాయిస్ఉన్నారు. యాదాద్రి జిల్లా హైదరాబాద్ నగరానికి అతి దగ్గరగా ఉంది.
అందుకే ఈ జిల్లాలో పని చేయడానికి చాలా మంది ఇష్టపడుతూ ఉంటారు. ఇక్కడ పనిచేసే ఆఫీసర్లు, ఎంప్లాయిస్ ఎక్కువ మందిహైదరాబాద్ నుంచే అప్ అండ్ డౌన్ చేస్తుంటరు. డ్యూటీకి ఇష్టమొచ్చినట్టు రావడం, అసలు రాకపోవడం సాగుతోంది. నాలుగు రోజుల క్రితమే బాధ్యతలు స్వీకరించిన కలెక్టర్ ఎం.హనుమంతరావు ముందుగా ఈ అంశంపై దృష్టి సారించినట్టుగా తెలుస్తోంది.
జిల్లాలో విస్తృత పర్యటన, తనిఖీలు..
దీపావళి పండుగ తెల్లారే.. కలెక్టర్ హనుమంతరావు జిల్లాలో విస్తృతంగా పర్యటించారు. పరిపాలన చక్కదిద్దే పనిలో పడ్డారు. రివ్యూలు, ఆకస్మిక తనిఖీలు నిర్వహించారు. ఇందులో భాగంగానే ఆలేరు సీహెచ్సీని కలెక్టర్ శుక్రవారం ఆకస్మికంగా తనిఖీ చేశారు. వార్డుల్లోకి వెళ్లి పేషెంట్లను పలకరించి అందుతున్న సేవలపై ఆరా తీశారు. మెడిసన్ సరఫరా వివరాలతోపాటు నిల్వలను పరిశీలించారు. అటెండెన్స్రిజిస్టర్ను పరిశీలించారు. నైట్ డ్యూటీ డాక్టర్విధుల్లో ఉన్నారని, హాస్పిటల్ సూపరింటెండెంట్స్వప్ప రాథోడ్, మరో ముగ్గురు డాక్టర్లు డ్యూటీకి రాని విషయం ఆయన దృష్టికి వచ్చింది.
దీంతో హాస్పిటల్ సూపరింటెండెంట్ స్వప్న , డాక్టర్లు శ్రీధర్, స్వప్న, రజినికి షోకాజ్నోటీసులు జారీ చేశారు. అనంతరం గుండాల పీహెచ్సీని కలెక్టర్ ఆకస్మికంగా తనిఖీ చేశారు. హాస్పిటల్పరిసరాలను పరిశీలించారు. అటెండెన్స్రికార్డులు తనిఖీ చేయగా పీహెచ్సీ హెల్త్ ఆఫీసర్ వెంకటేశం, ఎంపీహెచ్ఎస్ కరుణ, పీహెచ్ఎన్ వనజాకుమారి ఇంకా రాలేదని తేలింది. దీంతో ఆ ముగ్గురికి షోకాజ్ నోటీసులు జారీ చేశారు. ఆలేరులో నిర్వహంచిన సమగ్ర కుటుంబ సర్వే రివ్యూలో మండల స్పెషలాఫీసర్, డీఏవో గోపాల్ ఆలస్యంగా వచ్చారు.
దీంతో ఆగ్రహించిన కలెక్టర్ ఆయనకు కూడా షోకాజ్నోటీసు జారీ చేశారు. గుండాల పీఏసీఎస్ పరిధిలోని వడ్ల కొనుగోలు సెంటర్ను కలెక్టర్ ఆకస్మికంగా తనిఖీ చేశారు. కొనుగోలు సెంటర్ లో టాబ్స్, మాయిశ్చరైజర్ మిషన్లు , ప్యాడి క్లీనర్స్ లేకపోవడంతో అధికారులపై సీరియస్ అయ్యారు. ముఖ్య కార్యనిర్వాహణ అధికారి నాగయ్య, వ్యవసాయ విస్తరణాధికారి క్రాంతి లేకపోవడంతో వీరికి షోకాజ్ నోటీసులు ఇవ్వాలని సంబంధిత ఆఫీసర్లను
ఆదేశించారు.
సర్వేలో పాల్గొనని ఏడుగురికి షోకాజ్..
సమగ్ర కుటుంబ సర్వే నిర్వహణకు పలువురు అంగన్వాడీ టీచర్లకు డ్యూటీ వేశారు. అయితే డ్యూటీ వేసినా ఆలేరు ప్రాజెక్టు పరిధిలోని ఏడుగురు సర్వేకు వెళ్లలేదు. దీంతో కలెక్టర్ఆదేశాల మేరకు వారికి షోకాజ్నోటీసులు జారీ చేశారు. అడ్డగూడూరు పీహెచ్సీని కలెక్టర్ఆకస్మికంగా తనిఖీ చేశారు. హాస్పిటల్పరిసరాలు పరిశుభ్రంగా ఉండడం, వచ్చిన పేషెంట్లకు సకాలంలో ట్రీట్మెంట్ అందిస్తున్న తీరును పరిశీలించారు. హాస్పిటల్ చక్కగా నడిపిస్తున్న డాక్టర్ప్రవీణ్కుమార్ను కలెక్టర్అభినందించారు.
సమగ్ర కుటుంబ సర్వేపై రివ్యూ..
జిల్లాలోని ఆలేరు, గుండాల, అడ్డగూడురు, ఆలేరు మున్సిపాలిటీల్లో పర్యటించిన ఆయన సంబంధిత ఆఫీసర్లతో సమగ్ర కుటుంబ సర్వేపై రివ్యూ నిర్వహించారు. సర్వే వివరాలను సమగ్రంగా నమోదు చేయాలని ఆదేశించారు. ధరణి అప్లికేషన్లను పెండింగ్లో ఉంచకుండా పరిష్కరించాలని ఆదేశించారు.
