నీటి ఎద్దడి నివారణకు ముందస్తు చర్యలు

• ఎండాకాలంలో తాగునీటి సమస్య తలెత్తకుండా అధికారుల స్పెషల్​ డ్రైవ్​  
• ఎన్ని బోర్లున్నయ్.. ఎన్ని పని చేస్తున్నయ్..
• మిషన్ భగీరథ వాటర్ సరఫరా..పైప్​లైన్ల పరిస్థితిపై ఆరా 
• ప్రత్నామ్నాయ మార్గాల అన్వేషణ

యాదాద్రి, వెలుగు :ఎండాకాలం సమీస్తుండడంతో నీటి ఎద్దడి నివారణకు అధికారులు ముందస్తు చర్యలు తీసుకుంటున్నారు. ముందస్తు చర్యల్లో భాగంగా ప్రభుత్వం స్పెషల్ డ్రైవ్​నిర్వహిస్తోంది. మిషన్​ భగీరథ వాటర్​సరిపోతోందా..? ఎన్ని బోర్లు ఉన్నాయ్.. ఎన్ని పని చేస్తున్నాయ్.. అని ఆరా తీస్తోంది. 

యాదాద్రి జిల్లాలో 9 లక్షలకు పైగా జనాభా..

ఇటీవల నిర్వహించిన కుటుంబ సర్వే ప్రకారం జిల్లాలో 2,60,559 కుటుంబాలు ఉన్నాయి. 2011 జనాభా లెక్కల ప్రకారం 7,70,833 మంది ఉండగా, ప్రస్తుతం 9 లక్షల మందికి పైగా జనాభా ఉందని అధికారులు అంచనా వేశారు. ఈ జనాభాకు నీటి అవసరాలు తీర్చడానికి గ్రామాల్లోని బోరు బావులు, బావులు, చేతి పంపులు ఉన్పప్పటికీ.. నీరు సరిపోవడం లేదు. గత ప్రభుత్వం తీసుకొచ్చిన మిషన్​ భగీరథ కూడా పూర్తి స్థాయిలో అవసరాలను తీర్చలేకపోతోంది.  

అవసరం 80 ఎంఎల్ డీ..  

జిల్లాలోని 17 మండలాలు, ఆరు మున్సిపాలిటీల్లోని జనాభా అవసరాలకు ప్రతిరోజూ 80 ఎంఎల్​డీ నీరు అవసర పడుతోంది. అయితే మిషన్​ భగీరథ ద్వారా 60 ఎంఎల్​డీ నీరు అందుతోంది. దీంతో గ్రామ పంచాయతీలు, హామ్లెట్లలో సింగిల్​ఫేజ్, త్రీ ఫేజ్​కలిపి మొత్తంగా 2,295 బోరు బావులు, 34 బావులు ఉన్నాయి. మిషన్​ భగీరథ ద్వారా సరిపోను నీరు రాకపోవడంతో బోరుబావులు, బావుల నుంచి నీటిని ట్యాంక్​లకు సరఫరా చేసి వాటర్ సమస్య ఏర్పడకుండా చర్యలు తీసుకుంటున్నారు. అయినప్పటికీ.. గతేడాది ఎండాకాలంలో నీటి ఎద్దడి ఏర్పడింది. దీంతో జిల్లాలో 30 ప్రైవేట్ బోర్లను రెంట్​కు తీసుకొని నీటి ఎద్దడి ఏర్పడకుండా జాగ్రత్తలు తీసుకున్నారు. 

బోర్ల లెక్కలు తీస్తున్నరు.. 

ఎండాకాలంలో నీటి సమస్య ఏర్పడకుండా ప్రభుత్వం ముందస్తు చర్యలు తీసుకుంటుంది. ఇందులో భాగంగానే శనివారం నుంచి ఈ నెల 10 వరకు స్పైషల్​ డ్రైవ్ చేపట్టింది. ప్రతి మండలంలో ఎంపీవో, ఏఈవో, ఏఈ, పంచాయతీ సెక్రటరీతో కూడిన టీమ్స్​ను ఏర్పాటు చేశారు. ఈ టీమ్స్​లో జిల్లాలోని 428 పంచాయతీలు, ఆవాసాల్లో ప్రజలకు అవసరమైన నీరు అందుతుందా..? సరఫరా ఏర్పాట్లు ఎలా ఉన్నాయో ఆరా తీస్తున్నారు. ఏఏ మండలంలో ఎన్ని బోర్లు ఉన్నాయి..? వాటిలో ఎన్ని పని చేస్తున్నాయో తెలుసుకుంటున్నారు. అదేవిధంగా పైప్​లైన్ల పరిస్థితిని తెలుసుకుంటున్నారు. 

ప్రైవేట్ బోర్ల లెక్క కూడా..

నీటి ఎద్దడి ఏర్పడే అవకాశాలు ఉంటే గతేడాదిలా ప్రైవేట్​ బోర్లను రెంట్ కు తీసుకోవడానికి ముందస్తుగా ప్రణాళిక రూపొందిస్తున్నారు. జిల్లాలో సుమారు 90 వేల బోరుబావులు, 9 వేలకు పైగా బావుల ద్వారా పంటలు సాగు చేస్తున్నారు. వీటితోపాటు గ్రామాల్లోని కొందరి ఇండ్లలో బోర్లు ఉన్నాయి. వీటిలో నీటి అవసరాలను తీర్చడానికి ఉపయోగపడే బోర్ల గురించి ఆరా తీస్తున్నారు. వాటిని రెంట్​కు ఇవ్వడానికి ఆసక్తి ఉన్న యజమానుల వివరాలను తీసుకుంటున్నారు. గతంలో బోరు బావులను రెంట్​కు ఇచ్చిన వారిని సంప్రదిస్తున్నారు. 

ముందస్తు చర్యలు తీసుకుంటున్నాం 

ఎండాకాలంలో నీటి ఎద్దడి ఏర్పడకుండా చర్యలు తీసుకుంటున్నాం. జిల్లా వ్యాప్తంగా స్పెషల్​ డ్రైవ్ నిర్వహిస్తున్నాం. తరచూ నీటి సమస్య ఏర్పడే గ్రామాలను గుర్తించి.. చర్యలు తీసుకుంటాం. ప్రైవేట్​బోర్లును కూడా రెంట్​కు తీసుకుంటాం. - కరుణాకరన్​, డీఈ, ఆర్ డబ్ల్యూఎస్​, యాదాద్రి