యాదగిరిగుట్ట, వెలుగు: యాదగిరిగుట్టలో జరుగుతున్న అధ్యయనోత్సవాల్లో భాగంగా శనివారం నారసింహు వేణుగోపాలుడిగా, గోవర్ధనగిరిధారిగా దర్శనమిచ్చారు. ఉదయం మూలవరులకు నిత్య కైంకర్యాలు నిర్వహించిన అనంతరం స్వామివారిని వేణుగోపాలస్వామి అలంకారంలో ముస్తాబు చేసి ఆలయ మాఢ వీధుల్లో ఊరేగించారు. సాయంత్రం నిత్యారాధనలు ముగిసిన తర్వాత స్వామివారిని గోవర్ధనగిరిధారిగా అలంకరించి తిరువీధుల్లో విహరింపజేశారు.
అనంతరం ప్రత్యేక వేదికపై అధిష్టింపజేసి గోవర్ధనగిరిధారి అవతార విశిష్టతను అర్చకులు వివరించారు. కార్యక్రమంలో ఆలయ చైర్మన్‌ నరసింహమూర్తి, ఈవో భాస్కర్‌‌రావు, డిప్యూటీ ఈవో దోర్బల భాస్కర్‌‌శర్మ పాల్గొన్నారు. అధ్యయనోత్సవాల్లో భాగంగా ఆదివారం ఉదయం రామావతారం, సాయంత్రం వేంకటేశ్వరస్వామి అలంకార సేవలు చేపట్టనున్నారు.
