![కార్యకర్తలు సైనికుల్లా పనిచేయాలి : వీజీ గౌడ్](https://static.v6velugu.com/uploads/2023/10/yellareddy-constituency-brs-incha_NcseiE0YOr.jpg)
- ఎల్లారెడ్డి నియోజకవర్గ బీఆర్ఎస్ఇన్చార్జ్ వీజీ గౌడ్
లింగంపేట,వెలుగు : అసెంబ్లీ ఎన్నికలకు 45 రోజుల సమయమే ఉందని బీఆర్ఎస్ లీడర్లు, కార్యకర్తలు సైనికుల్లా పనిచేసి ఎమ్మెల్యే సురేందర్ను మరోసారి గెలిపిచాలని బీఆర్ఎస్ నియోజకవర్గ ఇన్చార్జ్ వీజీగౌడ్ కోరారు. ఎన్నికలు పూర్తయ్యే వరకు ఎల్లారెడ్డిలోనే ఉంటానని ఆయన అన్నారు. లింగంపేట సమీపంలోని జీఎన్ఆర్ గార్డెన్లో సోమవారం నియోజకవర్గంలోని సర్పంచులు, ఎంపీటీసీలు, బూత్ కమిటీల అధ్యక్షులతో సమావేశమయ్యారు. ఒక్కో బూత్ కమిటీ అధ్యక్షుడు వంద మంది ఓటర్లను నిత్యం కలుస్తూ.. సీఎం కేసీఆర్అమలు చేస్తున్న సంక్షేమ పథకాలను వివరించాలని సూచించారు.
వంద మందిలో కనీసం ఎనభై మంది బీఆర్ఎస్కే ఓటేసేలా కష్టపడి పనిచేయాలన్నారు. కేసీఆర్ హయాంలోనే తెలంగాణ అభివృద్ధి చెందిందని, ప్రభుత్వం అమలు చేస్తున్న సంక్షేమ పథకాలు దేశంలో ఎక్కడా లేవన్నారు. సర్పంచులు, ఎంపీటీసీలు, ఎంపీపీలు, జడ్పీటీసీలు, కార్యకర్తలు సమన్వయంతో పని చేస్తేనే విజయం వరిస్తోందన్నారు. తెలంగాణ ఉద్యమ కాలం నుంచి ఎల్లారెడ్డి గడ్డ బీఆర్ఎస్ పార్టీకి అండగా నిలిచిందని, మరోసారి ఇక్కడ గులాబీ జెండా ఎగరాలన్నారు.
అనంతరం బీఆర్ఎస్ అభ్యర్థి, సిట్టింగ్ ఎమ్మెల్యే జాజాల సురేందర్ మాట్లాడుతూ నియోజకవర్గంలో గడిచిన ఇరవై ఏండ్లలో జరగని అభివృద్ధి, అయిదేండ్లలోనే చేసి చూపించామన్నారు. ప్రజలందరికీ అందుబాటులో ఉంటూ సమస్యల పరిష్కారానికి కృషి చేశానన్నారు.