- మల్లాపూర్లో ఘటన ఇద్దరి అరెస్ట్
నాచారం, వెలుగు: తన కంటే వెనక వచ్చిన వ్యక్తికి పెట్రోల్ పోశాడన్న కోపంలో ఓ యువకుడు బంక్కు నిప్పింటించాడు. ఈ కేసులో యువకుడిని, బంక్ క్యాషియర్ ను నాచారం పోలీసులు అరెస్టు చేసి రిమాండ్కు తరలించారు. పోలీసుల వివరాల ప్రకారం.. మీర్పేటకు చెందిన చందన్కుమార్(19) మరో ఇద్దరు ఫ్రెండ్స్తో కలిసి శనివారం రాత్రి మల్లాపూర్ లోని హెచ్పీ పెట్రోల్ బంకుకు వెళ్లాడు.
తన బైక్ లో రూ.50 పెట్రోల్ పోయాలని బంక్ క్యాషియర్అరుణ్కుమార్(33)ను అడిగాడు. అతడు అప్పటికే మరో వ్యక్తికి పెట్రోల్ పోస్తుండడంతో.. తనకంటే వెనక వచ్చిన వ్యక్తికి బాటిల్లో పెట్రోల్ ఎందుకు పోస్తున్నావని నిలదీశాడు. దీంతో ఇద్దరి మధ్య మాటామాటా పెరిగింది. తన బైక్ లో ముందుగా పెట్రోల్ పోయాలని, లేదంటే బంకుకు నిప్పు పెడతానని బెదిరించాడు. ‘బంక్కు నిప్పు ఎలా పెడతావో పెట్టి చూడు నీ సంగతి చూస్తా’నంటూ బంక్క్యాషియర్ రెచ్చగొట్టాడు.
దీంతో ఆగ్రహానికి గురైన చందన్కుమార్ అగ్గిపుల్ల గీసి పెట్రోల్ గన్ పై వేశాడు. దీంతో ఒక్కసారిగా అక్కడ మంటలు చెలరేగాయి. దీంతో అక్కడున్న వారంతా పరుగులు తీశారు. వెంటనే బంక్లోని సిబ్బంది అప్రమత్తమై ఫైర్ ను ఆపే గ్యాస్ తో మంటలు ఆర్పివేశారు. ఈ ఘటనలో నిప్పు పెట్టిన యువకుడిని, బంక్ క్యాషియర్ ను నాచారం పోలీసులు అరెస్టు చేశారు.
