కొవిడ్ బారినపడ్డారంటే.. మందులేని రోగంతోనే కాదు, ట్రీట్మెంట్ కోసం కూడా పోరాడాల్సిందే. ఊపిరాడక సతమతమయ్యే టైమ్లో పేషెంట్ని చూసుకోవడం, బెడ్స్ వెతుక్కోవడం ఎంత కష్టమో చూశాం. ఆ కష్టాన్ని గట్టెక్కించేందుకు ముందుకొచ్చాడు శ్రీహర్ష. తనతో ఇంకొంతమంది భుజం కలిపారు. సాయం కోసం చూస్తున్నవాళ్లకు బెడ్స్, ఆక్సిజన్, మెడిసిన్.. ఏది కావాలంటే అది, ఎక్కడికంటే అక్కడ అందేలా చేశారు. వందలమంది వారియర్స్తో ఏర్పాటైన ‘కొవిడ్ వార్ రూమ్’కి కాల్ చేశారంటే సాయం యుద్ధ ప్రాతిపదికన అందుతుంది.
కొవిడ్ బారినపడ్డవాళ్లను కాపాడుకోవడానికి అటెండెంట్స్కి చాలా కష్టంగా ఉంటుంది. హాస్పిటల్కి చేర్చడానికి, హాస్పిటల్ మార్చడానికి ఇంట్లోవాళ్లందరూ తలా ఒక చేయి వేసే పరిస్థితి లేదు. అంటురోగం నుంచి అందరూ సేఫ్గా ఉండాలంటే ఒక్కరో, ఇద్దరో వెళ్లాలి. ఆ ఒక్కరే అన్నీ చూసుకోవాలంటే చాలా కష్టం. పేషెంట్ని చూసుకుంటూ హాస్పిటల్ బెడ్స్ కోసం, మందుల కోసం, ఆక్సిజన్ కోసం, అంబులెన్స్ కోసం వెదుకులాట ఎంతో కష్టంగా ఉండేది. కన్నీళ్లుపెట్టుకుంటూ తిరిగే జనాన్ని చూసి శ్రీహర్ష చలించిపోయిండు. ‘నేను కూడావాళ్లకు ఏదో ఒక సాయం చేస్తే వాళ్లకు ఆ తిరిగే బాధతప్పి కాసేపు పేషెంట్ బాగోగులు చూసుకుంటారు కదా’ అనుకుని సాయానికి ముందుకొచ్చిండు. ‘కొవిడ్ పేషెంట్స్కి హాస్పిటల్ బెడ్స్, ఆక్సిజన్, మెడిసిన్స్ కోసం ఇంట్లో ఉండి నా వంతు సాయం చేస్తాను. అవసరం ఉన్నవాళ్లు మెసేజ్ చేయండి. అవసరం ఉన్నవాళ్లకు చెప్పండి’ అని ఏప్రిల్ 29న ఇన్స్టాగ్రామ్లో పోస్ట్ చేసిండు. అది చూసి ఆక్సిజన్ బెడ్ కావాలని, రెమ్డిసివివర్ ఇంజెక్షన్ కావాలని శ్రీహర్షకు పేషెంట్ అటెండెంట్స్ నుంచి మెసేజ్లు వచ్చాయి. పేషెంట్స్ అటెండెంట్స్ తరపున హాస్పిటల్స్కి కాల్ చేసి ఎక్కడ బెడ్ ఉందో, ఎక్కడ ఆక్సిజన్ దొరుకుతుందో, ఎక్కడ మెడిసిన్స్ అందుబాటులో ఉన్నాయో కనుక్కునే పనిలోపడ్డాడు.
మేము కూడా సాయం చేస్తాం
రెండు రోజుల్లో ఓ పాతిక మందికి సాయం చేశాడు. మూడో రోజు ఓ ముప్పై మంది నుంచి ‘మేము కూడా హెల్ప్ చేస్తాం’ అంటూ శ్రీహర్షకు కాల్ చేశారు. బెడ్స్, ఆక్సిజన్ కాన్సన్ట్రేటర్స్, మెడిసిన్స్ కోసం తను ఎలా సెర్చ్ చేస్తున్నాడో వాళ్లకు చెప్పాడు. వాళ్లు కూడా అలాగే చేయడం మొదలుపెట్టారు. సాయం చేసేవాళ్లు పెరిగారు. శ్రీహర్ష తనకు వచ్చే మెసేజ్లను వాళ్లకు ఫార్వర్డ్ చేస్తున్నాడు. ఇలా ఒకరికొకరు ఇన్ఫర్మేషన్ పాస్ చేసుకుంటూ కొవిడ్ పేషెంట్స్కి సాయం చేస్తున్నారు.
ఒక్క రాత్రిలో..
శ్రీహర్ష ట్రిపుల్ ఐటీ, హైదరాబాద్లో ఇంజినీరింగ్ చదివాడు. 2016లో కోర్స్ పూర్తి చేశాడు. వాళ్ల కాలేజీ ఫేస్బుక్ గ్రూపులో.. ‘కొవిడ్ పేషెంట్స్కి సాయం చేస్తున్నాం. మీరు కూడా సాయం చేయడానికి ముందుకు రండి. మన అవసరం ఉన్నవాళ్లు చాలా మంది ఉన్నారు’ అని పోస్ట్ చేశాడు. వలంటీర్లుగా పనిచేసేందుకు ఇరవై, ముప్పై మంది వస్తారని ఆశించాడు. ఊహించనంత మంది ముందుకొచ్చారు. పోస్ట్ చేసినరాత్రికే 215 మంది వలంటీర్స్ రెడీ అయిపోయారు. తెల్లారేసరికి 300 మంది అయ్యారు. వీళ్లంతా కలిసి ‘కొవిడ్ వార్ రూమ్’ పేరుతో సర్వీస్ మొదలుపెట్టారు. వీళ్లలో తెలుగు రాష్ర్టాల్లో ఉండేవాళ్లే కాకుండా ఇతర రాష్ర్టాల్లో, అమెరికా, సౌదీలో ఉండేవాళ్లు కూడా ఉన్నారు. శ్రీహర్ష ట్విట్టర్, ఇన్స్టాగ్రామ్, ఫేస్బుక్కి వచ్చే రిక్వెస్టులను అందరికీ ఫార్వర్డ్ చేస్తున్నాడు.
వార్ రూమ్ రెడీ
కొవిడ్ వార్ రూమ్కు వచ్చే రిక్వెస్టులకు తగ్గట్టు వాటిని ఫాలో అప్ చేయడానికి కావాల్సిన టెక్నాలజీని ట్రిపుల్ ఐటీ స్టూడెంట్స్ ఒక్కరోజులోనే సెట్ చేశారు. శ్రీహర్షకు వచ్చే రిక్వెస్టులన్నీ ‘స్లాక్’ అనే మెసేజింగ్ ప్లాట్ఫామ్లోకి ఫార్వర్డ్ అవుతాయి. అందులో హైదరాబాద్ నుంచి ఎవరైనా సాయం కోసం కాల్ చేస్తే.. కొవిడ్ వార్ రూమ్లో హైదరా బాద్ బాధ్యత చూసే వాళ్లు ఆ మెసేజ్లు అందుకుంటారు. వెంటనే పేషెంట్ అటెండెంట్స్కి కాల్ చేస్తారు. ‘వాళ్లు ఎక్కడున్నారు? ఏం కావాలి? ఎప్పటికి కావాలి?’ అని తెలుసుకుంటారు.
బాధితులకు అకౌంట్లోకే పైసలు
ఈ టీమ్ స్పీడ్గా సాయం అందించే నెట్వర్క్ని పెంచుకున్న విషయం గమనించి చాలా మంది సాయం చేస్తామని ముందుకు వచ్చారు. హాస్పిటల్ ఫీజులు, ఆక్సిజన్ కాన్సన్ట్రేటర్స్, మెడిసిన్స్ కొనలేనివాళ్లకు దాతలు ఇచ్చే డబ్బులు ఖర్చుపెట్టేందుకు వార్ రూమ్ వలంటీర్స్ సాయపడుతున్నారు. కొవిడ్ వార్ రూమ్ టీమ్ ఎవరి నుంచీ నేరుగా డబ్బు తీసుకోదు. ఆన్లైన్లో ఫండ్ రైజింగ్ చేసేందుకు సాయపడే ‘గుడ్ క్లాప్స్’ ద్వారా డొనేట్ చేయమన్నారు. పేద పేషెంట్స్ అవసరాలు గుర్తించి, వాళ్లకు ఎంత కావాలో వలంటీర్లే ఎంక్వైరీ చేసి ఆ డబ్బుల్ని నేరుగా వాళ్ల అకౌంట్స్లోకే ట్రాన్స్ఫర్ చేస్తున్నారు. దీనికోసం పది మందితో ఒక వెరిఫికేషన్ టీమ్ పనిచేస్తోంది. కొవిడ్ పేషెంట్సే కాకుండా లాక్డౌన్ వల్ల నష్టపోయిన పేదవాళ్లకు, మెడికల్ ఎమర్జెన్సీ ఉన్న పేద పిల్లలకు కూడా డబ్బులు ఇచ్చారు. ప్రపంచంలో ఎక్కడివాళ్లైనా కొవిడ్ వార్ రూమ్కి సాయం కోసం వచ్చేవాళ్లకు goodclap.com/cwr లింక్ ద్వారా డబ్బు సాయం చేయొచ్చు.
దేశవిదేశాల నుంచి
‘కొవిడ్ వార్ రూమ్’ 500 మంది వలంటీర్లతో మహమ్మారిపై యుద్ధం చేస్తోంది. వీళ్లలో అమెరికా, సౌదీ అరేబియాలో జాబ్ చేస్తున్నవాళ్లు కూడా ఉన్నారు. గూగుల్, ట్విట్టర్ లాంటి కంపెనీల్లో పని చేసే ఉద్యోగులున్నారు. డ్యూటీ అయ్యాక, వార్ రూమ్ సర్వీసులో ఉంటున్నారు. ఇలా పనిచేయడం నాకెంతో సంతోషంగా ఉందని డెంటిస్ట్ డాక్టర్ మౌనిక అంటోంది. ‘నలభై మందికి సాయపడ్డాను. వాళ్ల కష్టాన్ని ఓపికగా విన్నాను. వాళ్లకు కచ్చితమైన సాయం ఎక్కడ అందుతుందో ఎంక్వైరీ చేశాను. జీవితంలో ఇంతకంటే గొప్ప పని ఏముంటుంది? లాక్ డౌన్ టైంలో కొవిడ్ వార్ రూమ్ వల్ల నలుగురికి సాయపడే అవకాశం వచ్చింది’ అని చెప్పింది ఈ యంగ్ డాక్టర్. మిగతావాళ్ల మాటలు కూడా ఇవే. మౌనిక లాంటి డాక్టర్లు, ఇంజినీర్లు, మేనేజర్లు, స్టూడెంట్స్, రీసెర్చ్ స్కాలర్స్ చాలా మంది ఇందులో ఉన్నారు. ‘‘నాకు తోచిన సాయం చేస్తాను. వచ్చేపోయేవాళ్ల పేర్లు రాసి, ఎక్సెల్లో మీకు డేటా ఎంట్రీ చేసిపెడతాను’’ అని దుబాయ్లో సెక్యూరిటీ గార్డ్గా పనిచేసే వ్యక్తి ఈ వారియర్స్లో చేరిండు. వేల మందికి బెడ్స్, మెడిసిన్స్ ఇప్పించారు. అట్లనే కొవిడ్ టైమ్లో తిండికి ఇబ్బంది పడుతున్నామని పోచంపల్లి వీవర్స్ కాల్ చేస్తే 50 మందికి ఆర్థికసాయం చేశారు. పిల్లల్ని చూసుకునేందుకు పనికిపోలేని సింగిల్ మదర్, పాలిచ్చే తల్లులకు కూడా సాయం చేశారు. సెక్స్ వర్కర్స్, హెచ్ఐవీ బాధితులకు తిండికోసమని ఆర్థిక సాయం చేశారు. పిల్లలకు ఎమర్జెన్సీ సర్జరీలకు డబ్బులు ఇచ్చారు. ‘‘ఇస్తున్నాం. ఇస్తూనే ఉంటామ’’ని వార్ రూమ్ వారియర్స్ అంటున్నారు.
కొవిడ్ వార్ రూమ్కి కాల్ చేసేవాళ్ల కోసం ఒక హెల్ప్ లైన్ నెంబర్ ఏర్పాటు చేశారు. అవసరం ఉన్నవాళ్లు ఈ 63042 96587 నెంబర్కు కాల్ చేయొచ్చు.
కన్నీళ్లు తుడుద్దాం
‘‘ఇంట్లోవాళ్లు కొవిడ్ బారినపడితే వాళ్ల బాధల్లో వాళ్లుంటారు. అటెండెంట్స్ ఎమోషన్ బర్డెన్తో ఉంటారు. ఆ టెన్షన్లో బ్లడ్ కోసం, మందుల కోసం ఫోన్ చేయడం కష్టంగా ఉంటుంది. కాబట్టి ఎంక్వైరీ చాలా స్పీడ్గా చేయగలుగుతాం. పని తొందరగా అవుతుంది. వాళ్లకు టైమ్ సేవ్ అవుతుంది. వాళ్లకు పేషెంట్ని చూసుకునే టైమ్ దొరుకుతుంది’’.
- శ్రీహర్ష కారంచేటి
నాగవర్దన్ రాయల
