రోడ్డు మీద వెళ్తుంటే అప్పుడప్పుడు పెట్రోల్ లేక బైక్ని తోసుకుంటూ వెళ్లేవాళ్లు కనిపిస్తుంటారు. వాళ్లను చూసి ‘అయ్యో పెట్రోల్ అయిపోయినట్టుందే!’ అని జాలి పడడం తప్ప చేసేదేమీ లేక వెళ్లిపోతుంటాం. కానీ.. లక్ష్మణ్ అలాంటి వాళ్లకోసం తన బైక్లో ఎప్పుడూ ఒక పెట్రోల్ బాటిల్ పెట్టుకుంటాడు. ఒకవేళ అతని దగ్గర పెట్రోల్ లేకపోతే.. బైక్ని కాలితో నెడుతూ పెంట్రోల్ బంక్ వరకు తీసుకెళ్తాడు. ఇదొక్కటే కాదు.. తన ప్రయాణంలో ఇబ్బందుల్లో ఉన్నవాళ్లు ఎవరైనా కనిపిస్తే.. తోచిన సాయం చేస్తాడు. అందుకే అతనికి దేశమంతా ఫాలోవర్స్ ఉన్నారు. అన్ని రాష్ట్రాలవాళ్లు అతని వీడియోలను చూస్తున్నారు.
యూట్యూబ్లో చాలా తక్కువ టైంలో సక్సెస్ అయిన ఇన్ప్లుయెన్సర్ల లిస్ట్‌‌‌‌లో లక్ష్మణ్ ముందు వరుసలో ఉంటాడు. అతని అసలు పేరు లక్ష్మణ్ గోస్వామి అయినప్పటికీ అతని చానెల్ ‘లేకి రైడర్’ పేరుతో ఎక్కువ గుర్తింపు పొందాడు. లక్ష్మణ్ కర్నాటకలో పుట్టి పెరిగాడు. కానీ.. బైక్ రైడ్స్ చేస్తూ దేశమంతా తిరిగాడు. లక్ష్మణ్ ఇప్పటివరకు థ్రిల్లింగ్ బైకింగ్ అడ్వెంచర్స్ చాలా చేశాడు.
అయితే.. అవి చేసినప్పుడు వచ్చిన ఫాలోవర్స్ కంటే.. హెల్పింగ్ వీడియోలు చేసినప్పుడు వచ్చిన ఫాలోవర్స్ సంఖ్య చాలా ఎక్కువ. బైకింగ్ అతని హాబీ అయితే.. సాయం చేయడం అతని గుణం. అందుకు అతను కర్నాటకలో చాలా ఫేమస్. ఎక్కడ అతని బైక్ కనిపించినా అభిమానులు చుట్టుముడుతుంటారు. అందుకే తన సబ్స్క్రయిబర్స్ కోసం అప్పుడప్పుడు మీటప్లు కూడా పెడుతుంటాడు లక్ష్మణ్.
రైడింగ్ కోసమే..
లక్ష్మణ్కి చిన్నప్పటినుంచి బైక్ నడపడం అంటే ఇష్టం. అందుకే రెగ్యులర్గా లాంగ్ రైడ్స్ చేస్తుండేవాడు. అలా కొన్నాళ్లకు తన రైడ్స్ని వీడియోలు తీసి సోషల్ మీడియాలో పోస్ట్ చేయాలనే ఆలోచన వచ్చింది. అలా యూట్యూబ్లో చానెల్ పెట్టాడు. తన డ్యూక్ బైక్ మీద తిరుగుతూ.. హీరో గోప్రో కెమెరాతో వీడియోలు తీసి పోస్ట్ చేయడం మొదలుపెట్టాడు. కానీ.. వాటికి పెద్దగా వ్యూస్ రాలేదు.
అయితే.. తను రైడింగ్ చేస్తున్నప్పుడు ఎక్కడైనా ఇబ్బందుల్లో ఉన్నవాళ్లు కనిపిస్తే తన వంతుగా ఎంతో కొంత సాయం చేసేవాడు. దాన్ని కూడా వీడియో తీసి చానెల్లో పోస్ట్ చేయడం మొదలుపెట్టాడు. అతని మంచి మనసును అందరూ మెచ్చుకున్నారు. దాంతో ఇప్పుడు రైడింగ్ కంటెంట్ కంటే హెల్పింగ్ వీడియోలే ఎక్కువగా పోస్ట్ చేస్తున్నాడు.
ఇన్స్పైర్
లక్ష్మణ్ చేసేది చిన్న చిన్న సాయాలే. కానీ.. అలాంటివి చేయడానికి కూడా ఎంతో పెద్ద మనసు ఉండాలి. లక్ష్మణ్ పెద్ద మనసుతో పేదవాళ్లకు ఫుడ్ పెట్టడం, వీధి కుక్కలకు బిస్కెట్లు వేయడం, తన ప్రయాణాల్లో యాదృచ్ఛికంగా కలిసే వ్యక్తులకు సాయం చేయడం లాంటివి చేస్తున్నాడు. అతన్ని చూసి ఎంతోమంది ఇన్స్పైర్ అయ్యారు. అతని వల్ల కర్నాటకలో చాలామంది ఇలాంటి చిన్న చిన్న సాయాలు చేయడం మొదలుపెట్టారు.
సాయం కోసం వెబ్సైట్
‘‘యూట్యూబర్‌‌‌‌గా నా ప్రయాణాన్ని 2021లో స్టార్ట్ చేశా. దానివల్ల ఎంతోమంది ప్రేమని దక్కించుకున్నా. ఈ అపారమైన ప్రేమ, సపోర్ట్‌‌‌‌ని నేను ఎప్పుడూ ఎక్స్పెక్ట్‌ చేయలేదు. వీడియోలు చేయాలనే లక్ష్యంతోనే యూట్యూబ్ మొదలుపెట్టా. కానీ.. ఇప్పుడు నలుగురికీ సాయం చేయాలనే లక్ష్యంతో పనిచేస్తున్నా. అందుకే నాకు సాయం చేయడానికి చాలామంది ముందుకొస్తున్నారు. కానీ.. అలాంటివాళ్ల దగ్గర్నించి నేరుగా డబ్బు తీసుకోవడం నాకు ఇష్టం లేదు’ అంటున్నాడు లక్ష్మణ్.
కానీ.. ఎవరైనా కచ్చితంగా సాయం చేస్తామంటే నేరుగా తీసుకోకుండా తన వెబ్సైట్ నుంచి వస్తువులు కొనాలని చెప్తున్నాడు. అతను లేకిగో పేరుతో ఇ–కామర్స్ వెబ్సైట్ నడుపుతున్నాడు. అందులో ఉండే వస్తువులను ఎవరైనా కొంటే... దాని మీద వచ్చే లాభాన్ని పేదలకు సాయం చేయడానికి వాడుతున్నాడు.
పది మిలియన్లకు దగ్గర్లో..
లక్ష్మణ్ గోస్వామి నడిపే చానెల్ ‘లేకి రైడర్’కి ఇప్పటివరకు 9.53 మిలియన్ల మంది సబ్స్క్రయిబర్లు ఉన్నారు. చానెల్ పెట్టిన మూడేండ్లలోనే పది మిలియన్ల సబ్స్క్రయిబర్ల మార్క్కు దగ్గరైంది. ఇప్పటివరకు చానెల్లో 2600 వీడియోలు పోస్ట్ చేశాడు. వాటిలో ఎక్కువగా షార్ట్ వీడియోలే ఉన్నాయి. లక్ష్మణ్ పోస్ట్ చేసే పెద్ద వీడియోలకు పెద్దగా వ్యూస్ రావడం లేదు. కానీ.. షార్ట్ వీడియోలు మాత్రం రెగ్యులర్గా వైరల్ అవుతుంటాయి.
లక్ష్మణ్ ఒకసారి ట్రాఫిక్లో ఇరుక్కున్నాడు. అతని పక్కనే అంబులెన్స్ ఉంది. అందులో ఉన్న పేషెంట్ పరిస్థితి సీరియస్గా ఉందని తెలిసి లక్ష్మణ్ ఫుట్పాత్ మీదకి బైక్ ఎక్కించి సిగ్నల్ వరకు వెళ్లి ట్రాఫిక్ క్లియర్ చేశాడు. అదంతా వీడియో తీసి యూట్యూబ్లో పెట్టాడు. దానికి ఏకంగా 122 మిలియన్ల వ్యూస్ వచ్చాయి. పది మిలియన్ల వ్యూస్ దాటిన వీడియోలు చానెల్లో చాలానే ఉన్నాయి.
