న్యూఢిల్లీ : ఆటోమోటివ్ ఇండస్ట్రీకి సేఫ్టీ సిస్టమ్స్ను అందజేసే జెడ్ఎఫ్ లైఫ్ టెక్ గురువారం హైదరాబాద్లో గ్లోబల్ కేపబిలిటీ సెంటర్ (జీసీసీ)ని ప్రారంభించింది. జెడ్ఎఫ్ గ్రూప్ నుంచి జెడ్ఎఫ్ లైఫ్టెక్ను విడదీయడానికి ఈ నిర్ణయం తీసుకున్నారు. సెప్టెంబరు నెలాఖరు నాటికి ఈ ప్రక్రియ పూర్తవుతుందని భావిస్తున్నారు. ఈ జీసీసీ అందుబాటులోకి రావడం వల్ల ప్రపంచవ్యాప్తంగా మరింత బలపడతామని, భారతదేశం వెలుపల గ్లోబల్ ఇంజనీరింగ్ అవసరాలను త్వరగా అందించగలమని జెడ్ఎఫ్లైఫ్టెక్ ఎగ్జిక్యూటివ్ వైస్ ప్రెసిడెంట్ రుడాల్ఫ్ స్టార్క్ అన్నారు.
జెడ్ఎఫ్లైఫ్టెక్ ఇండియా ఎగ్జిక్యూటివ్ డైరెక్టర్ రవికుమార్ తిరుముకులు మాట్లాడుతూ, కేంద్రం ఆవిష్కరణలను, భద్రతా ప్రమాణాలను ప్రోత్సహిస్తోందని అన్నారు. ఈ ఆఫీసులో 200 మందికి పైగా ఉద్యోగులు ఉంటారని తెలిపారు. కంపెనీ గత ఏడాది 4.6 బిలియన్ డాలర్ల గ్రూప్ టర్నోవర్‌‌ను నమోదు చేసింది. తెలంగాణ ఐటీ, పరిశ్రమల శాఖ మంత్రి శ్రీధర్‌‌బాబు ఈ కేంద్రాన్ని లాంఛనంగా ప్రారంభించారు.
ఈ సందర్భంగా మంత్రి మాట్లాడుతూ జెడ్ఎఫ్ జీసీసీ ప్రారంభంతో తెలంగాణా ప్రపంచ స్థాయి సాంకేతిక, నూతన పరిశోధనల గమ్యస్థానంగా మారిందని అన్నారు. దీనివల్ల ప్రస్తుతం 200 మందికి ఉద్యోగాలు లభించాయని, వచ్చే మూడేళ్లలో ఈ సంఖ్య 500 దాటుతుందని ఆయన అన్నారు. ఇన్నోవేషన్‌లో తెలంగాణను అగ్రగామిగా నిలుపుతామని అన్నారు.
