ఫుణె: మహారాష్ట్రలోని ఫుణె సిటీలో జికా వైరస్ కలకలం రేపింది. ఓ డాక్టర్ తో పాటు ఆయన కూతురు ఈ వైరస్ కు పాజిటివ్ గా తేలారు. అయితే, వారి ఆరోగ్య పరిస్థితి నిలకడగానే ఉందని అధికారులు తెలిపారు. ఫుణెకు చెందిన ఓ డాక్టర్ ఇటీవల అస్వస్థతకు గురయ్యారు. జ్వరం, దద్దుర్లు వంటి లక్షణాలతో ఓ ప్రైవేటు ఆస్పత్రిలో చేరారు. ఆయన బ్లడ్ శాంపిల్స్ ను కలెక్ట్ చేసిన మెడికల్ అధికారులు విశ్లేషణ కోసం సిటీలోనే ఉన్న నేషనల్ ఇనిస్టిట్యూట్ ఆఫ్ వైరాలజీ (ఎన్ఐవీ)కి పంపించారు.
జూన్ 21న ఆయన జికా వైరస్ కు పాజిటివ్ గా తేలారు. దీంతో ఫుణె మెడికల్ కార్పొరేషన్ అధికారులు వెంటనే అప్రమత్తమై అతడి కుటుంబ సభ్యుల బ్లడ్ శాంపిల్స్ను కలెక్ట్ చేసి పరీక్షలు నిర్వహించారు. ఈ క్రమంలోనే అతడి 15 ఏండ్ల కూతురికి కూడా వైరస్ నిర్ధారణ అయింది. ఒకే ఇంట్లో రెండు కేసులు నమోదు కావడంతో అధికారులు అప్రమత్తమయ్యారు. ముందు జాగ్రత్తగా ఆ ప్రాంతంలో వైరస్ వ్యాప్తి నివారణ చర్యలు చేపట్టారు.
