- జీహెచ్ఎంసీ కమిషనర్ ఇలంబరితి వెల్లడి
హైదరాబాద్ సిటీ, వెలుగు: జూపార్క్– ఆరాంఘర్ ఫ్లైఓవర్ ను నాలుగైదు రోజుల్లో ప్రారంభిస్తామని జీహెచ్ఎంసీ కమిషనర్ ఇలంబరితి చెప్పారు. బుధవారం హెచ్ఎండీ ఆఫీసులో నిర్వహించిన చిట్ చాట్ లో ఆయన తెలిపారు. ఫ్లైఓవర్పనులు పూర్తయ్యాయని, అందుబాటులోకి వస్తే ట్రాఫిక్ సమస్య చెక్పడుతుందన్నారు. ఎస్ఆర్డీపీలో భాగంగా 2021లో ఫ్లైఓవర్పనులు ప్రారంభించగా, పలు కారణాలతో కొన్నేళ్లపాటు పనులు జరగలేదు.
గతేడాది పనుల్లో స్పీడ్పెరిగింది. దీని అంచనా వ్యయం రూ.636.80 కోట్లు కాగా, పూర్తయ్యేనాటికి ఖర్చు రూ.736 కోట్లకు చేరింది. 24 మీటర్ల వెడల్పుతో 6 లేన్లలో 4.08 కిలోమీటర్ల పొడవుతో ఈ ఫ్లైఓవర్ను నిర్మించారు. ప్రారంభిస్తే జూపార్క్ నుంచి ఆరాంఘర్ మీదుగా శంషాబాద్ ఎయిర్‌పోర్ట్, మహబూబ్‌నగర్, కర్నూలు, అనంతపురం, బెంగళూరుకు రాకపోకలు సాఫీగా సాగుతాయి.
ప్రస్తుతం ఈ రూట్లోని తాడ్బన్, దానమ్మ హట్స్, హసన్ నగర్ జంక్షన్లలో ఎక్కడా ఆగకుండా నేరుగా వెళ్లేందుకు వీలుంటుంది. జూపార్క్ సందర్శకులు, పాతబస్తీ వైపు వెళ్లేవారికి జర్నీ ఈజీ కానుంది.
